Leicester City បញ្ចប់តំណែងគ្រូបង្វឹកលោក Steve Cooper

Premier League
November 25th, 2024 (1 year)
849 Views
Share

Leicester City បានបញ្ចប់តំណែងគ្រូបង្វឹកលោក Steve Cooper ក្រោយពីលោកដឹកនាំក្លិបមួយនេះ ទើបបានតែ១៥ប្រកួត។

លោក Steve Cooper បានចូលដឹកនាំ Leicester City កាលពីខែមិថុនា កន្លងទៅ ដោយកាន់តំណែងបន្តពីលោក Enzo Maresca ដែលបានចាកចេញទៅដឹកនាំ Chelsea ។

ទោះយ៉ាងណា ការដឹកនាំរបស់បុរស ជនជាតិវេលស៍ វ័យ៤៤ឆ្នាំ មិនទទួលលទ្ធផលល្អដូចការរំពឹងទុក ដោយឆ្លងកាត់ ១២ ប្រកួតនៅក្របខណ្ឌ Premier League ក្រុម Leicester City ឈ្នះតែ២ដង ស្មើ ៤ដង និង ចាញ់ ៦ដង។

ការបរាជ័យចុងក្រោយរបស់ពួកគេគឺចាញ់ Chelsea នៅក្របខណ្ឌ Premier League ដោយលទ្ធផល ២-១ ដែលធ្វើអោយ Leicester City ឈរនៅលេខ១៦ក្នុងតារាងពិន្ទុ មាន ១០ ពិន្ទុ ពីលើតំបន់កាត់ចោលតែ១ពិន្ទុ។

លោក Steve Cooper ក៏បានដឹកនាំ Leicester City ទទួលលទ្ធផលមិនល្អនៅពានរង្វាន់ EFL Cup ដោយធ្លាក់ត្រឹមជុំទី៤ ក្រោយចាញ់ Manchester United ៥-២។

ជុំវិញការបញ្ចប់តំណែងលោក Steve Cooper នេះដែរក្លិប Leicester City បានចេញសេចក្តីថ្លែងការណ៍ថា “ក្លិបសូមអរគុណដល់ការលះបង់របស់លោក Steve Cooper និងជូនពរលោកទទួលជោគជ័យនៅពេលអនាគត។ សម្រាប់ការហ្វឹកហ្វឺនក្រុមនឹងត្រូវត្រួតពិនិត្យដោយជំនួយការគ្រូបង្វឹកលោក Ben Dawson ខណៈដែលក្លិបចាប់ផ្តើមដំណើរការតែងតាំងគ្រូបង្វឹកថ្មី ដែលក្លិបសង្ឃឹមថានឹងបញ្ចប់អោយបានឆាប់តាមដែលអាចធ្វើទៅបាន។”

លោក Steve Cooper បានកា្លយជាគ្រូបង្វឹកទី២ នៅក្នុងក្របខណ្ឌ Premier League ២០២៤-២៥ នេះ ដែលត្រូវបានបញ្ចប់តំណែង បន្ទាប់ពី លោក Erik ten Hag ដែលត្រូវបាន Man UTD បញ្ចប់តំណែងកាលពីពេលថ្មីៗនេះ៕

អត្ថបទទាក់ទង