ខ្សែប្រយុទ្ធ Vinicius Junior អាចខកខានការប្រកួតរវាង Real Madrid ទល់ Liverpool

Premier League
November 26th, 2024 (5 months)
282 Views
Share

ខ្សែប្រយុទ្ធ Vinicius Junior អាចនឹងខកខានការប្រកួត UEFA Champions League របស់ Real Madrid ទល់នឹង Liverpool បន្ទាប់ពីរបួសសាច់ដុំជើងក្នុងជ័យជំនះ ៣-០ របស់ពួកគេនៅ ទឹកដីក្រុម Leganes នៅក្របខណ្ឌ La Liga កាលពី ចុងសប្តាហ៍កន្លងទៅ។

ប្រភពជិតស្និទ្ធនឹងកីឡាករបានប្រាប់ Reuters ថា កីឡាករប្រេស៊ីល វ័យ២៤ឆ្នាំ ត្រូវបានគេរំពឹងថានឹងត្រូវអវត្តមានពី ៣ ទៅ ៤ សប្តាហ៍។ វាមានន័យថា រូបគេអាចខកខានរហូតដល់ទៅ ៧ ប្រកួតនៅក្នុងការប្រកួតទាំងអស់មុនពេលសម្រាករដូវរងារ រួមទាំងពេលប៉ះ Girona និង Athletic Bilbao នៅក្របខណ្ឌ La Liga និងការប្រកួត UEFA Champions League ទល់នឹង Atalanta ថែមទៀត។

Real Madrid បាននិយាយនៅក្នុងសេចក្តីថ្លែងការណ៍មួយថា “បន្ទាប់ពីការធ្វើតេស្តលើកីឡាករ Vinicius Junior របស់យើង បានបង្ហាញថា គេមានរបួសនៅជើងឆ្វេងដែលនឹងធ្វើអោយរូបគេអវត្តមានមួយរយៈ។”

Vinicius Junior គឺជាកីឡាករចុងក្រោយគេដែលចូលរួមក្នុងបញ្ជីរបួសរយៈពេលវែងរបស់ Real Madrid ដែលរួមមានកីឡាករសំខាន់ៗដូចជា Rodrygo, Eder Militao, Dani Carvajal, Lucas Vazquez, Aurelien Tchouameni និង David Alaba ។

Real Madrid កំពុងឈរនៅលេខរៀងទី២ ក្នុងតារាងពិន្ទុ La Liga ដោយមាន ៣០ ពិន្ទុ តាមពីក្រោយក្រុម Barcelona ចំនួន ៤ ពិន្ទុ ។

ទោះបីជាយ៉ាងណាក៏ដោយ បន្ទាប់ពីចាញ់២លើកក្នុងការប្រកួត៣លើកចុងក្រោយរបស់ពួកគេក្នុងក្របខណ្ឌ UEFA Champions League ក្រុមរបស់លោក Carlo Ancelotti អាចមានបញ្ហាជាមួយនឹងលទ្ធផលមិនល្អនៅកីឡដ្ឋាន Anfield ។ ពួកគេស្ថិតនៅលេខ១៨ក្នុងតារាងក្រុមទាំង៣៦ក្រុមដោយមាន៦ពិន្ទុពីការប្រកួត៤លើក៕

អត្ថបទទាក់ទង