អ្នកគាំទ្រ Aston Villa រំពឹងក្លិបនាំយកខ្សែបម្រើ Douglas Luiz ត្រឡប់មកវិញ

Premier League
November 27th, 2024 (1 year)
527 Views
Share

អ្នកគាំទ្រ Aston Villa មានការរំពឹងថា ក្លិបនឹងអាចនាំយកខ្សែបម្រើ Douglas Luiz ត្រឡប់មកវិញ។ នេះបើតាមការផ្សព្វផ្សាយពីសារពត៌មាន Caught Offside។

កីឡាករប្រេស៊ីល បានចាកចេញពី Aston Villa ទៅចូលរួមជាមួយ Juventus តម្លៃ៥០លានអឺរ៉ូនៅរដូវក្តៅនេះ ដោយបានចុះហត្ថលេខាលើកិច្ចព្រមព្រៀងរយៈពេល ៥ឆ្នាំ ។ ការបញ្ចេញ Douglas Luiz នៅពេលនោះ គឺជាការបង្ខំចិត្តរបស់ក្លិប Aston Villa ដើម្បីបំពេញតាមច្បាប់ប្រាក់ចំណេញ និងនិរន្តរភាព របស់ក្របខណ្ឌ Premier League តែវាក៏បានជួយសម្រួលដល់ការមកដល់របស់កីឡាករថ្មីៗដូចជា Samuel Iling-Junior និង Enzo Barrenechea ផងដែរ។ ខណៈពេលដែលការចាកចេញរបស់កីឡាករវ័យ២៦ឆ្នាំ គឺជាការចាំបាច់ផ្នែកហិរញ្ញវត្ថុ វាក៏ជាការលាគ្នាដ៏ជូរចត់សម្រាប់អ្នកគាំទ្រ Aston Villa ដែលមានភាពសោកស្តាយ ដ្បិតក្លិបបានបាត់បង់កីឡាករដែលតែងតែជួយក្រុមយ៉ាងចាំបាច់នាពេលកន្លងមក។

ក្នុងអំឡុងពេលរបស់ Douglas Luiz នៅ Aston Villa គេបានពង្រឹងកេរ្តិ៍ឈ្មោះក្លាយជាខ្សែបម្រើដ៏គួរអោយទុកចិត្តបំផុតម្នាក់របស់ក្លិបនៅ Premier League មួយនេះ។ ចាប់តាំងពីមកដល់ឆ្នាំ ២០១៩ Douglas Luiz បានក្លាយជាតួអង្គសំខាន់សម្រាប់ក្រុម ដោយបានស៊ុត ២២ គ្រាប់ និង ចែកបាល់សម្រេចទី២៤ដង ក្នុងការបង្ហាញខ្លួន ២០៤ប្រកួតនៅគ្រប់កម្មវិធី។ រដូវកាលឆ្នាំ ២០២៣-២៤ Douglas Luiz មានភាពលេចធ្លោជាមួយ Aston Villa ដោយស៊ុតបាន១០គ្រាប់ និង ចែកបាល់សម្រេចទី១០ដង ក្នុង ៥៣ ប្រកួត ដែលធ្វើអោយរូបគេទទួលបានពានរង្វាន់ជាកីឡាករប្រចាំរដូវកាលរបស់អ្នកគាំទ្រ និងកីឡាករឆ្នើមប្រចាំរដូវកាលផងដែរ។

សម្រាប់ការចាប់ផ្តើមរបស់ Douglas Luiz ជាមួយ Juventus ហាក់មិនមានភាពល្អប្រសើរនោះឡើយ។ រូបគេត្រូវបានញ៉ាំញីដោយបញ្ហារបួស ហើយបានខកខានការប្រកួតចំនួន ៧ ប្រកួតជាប់ៗគ្នា និងបង្ហាញខ្លួនត្រឹមតែ ៩ ប្រកួតប៉ុណ្ណោះនៅគ្រប់ការប្រកួតទាំងអស់ក្នុងរដូវកាលនេះអោយក្លិបសេះបង្កង់។

ខណៈពេលដែល Douglas Luiz មិនអាចបង្ហាញសក្កដានុពលពេញលេញសម្រាប់ការលេងនៅក្របខណ្ឌ Serie A នោះ អ្នកគាំទ្រ Aston Villa ក៏បានសង្ឃឹមថា ក្លិបរបស់ពួកគេនឹងអាចនាំយកកីឡាកររូបនេះ ត្រឡប់មកវិញ ដើម្បីបង្ហាញសមត្ថភាពដ៏លេចធ្លោរបស់គេបានដូចដើម។

ជាមួយនឹងតម្លៃទីផ្សារបច្ចុប្បន្ន ៥៥ លានអឺរ៉ូ Douglas Luiz ត្រូវបានរំពឹងថានឹងបង្ហាញពីជំនាញនិងភាពខ្លាំងក្លា ហើយអាជីពរបស់គេពិតជាមានភាពស្ថិតស្ថេរ បើសិនជារូបគេអាចវិលត្រឡប់មក កីឡដ្ឋាន Villa Park វិញបាន៕

អត្ថបទទាក់ទង