លោក Enzo Maresca ថា Chelsea មិនទាន់គ្រប់គ្រាន់ប្រជែងជើងឯក Premier League

Premier League
December 3rd, 2024 (2 months)
216 Views
Share

គ្រូបង្វឹក Chelsea លោក Enzo Maresca បានទទូចថា ក្រុមតោខៀវរបស់លោកនៅមិនទាន់ត្រៀមខ្លួន និងមានលក្ខណៈសម្បត្តិគ្រប់គ្រាន់ សម្រាប់ការប្រកួតប្រជែងដណ្តើមជើងឯកពានរង្វាន់ Premier League នោះទេ។

ក្រុម Chelsea ទើបតែបានយកឈ្នះក្រុម Aston Villa ៣-០ ក្នុងការប្រកួតក្របខណ្ឌ Premier League កាលពីចុងសប្តាហ៍កន្លងទៅ។ លទ្ធផលនេះមានន័យថា ក្រុមតោខៀវ មិនចាញ់ ៥ប្រកួតជាប់គ្នា នៅក្របខណ្ឌ Premier League រាប់ចាប់តាំងពីការចាញ់ Liverpool ២-១ កាលពីខែតុលាកន្លងទៅ។

មានលទ្ធផលគួរអោយចាប់អារម្មណ៍បែបនេះក្តី លោក Enzo Maresca ក្នុងរដូវកាលដំបូងរបស់ខ្លួនទទួលបន្ទុកដឹកនាំក្រុម Chelsea បន្ទាប់ពីលោក Mauricio Pochettino នោះ ជឿជាក់ថា ក្រុមកីឡាកររបស់លោកនៅក្មេងខ្ចីណាស់ ហើយត្រូវការបទពិសោធន៍បន្ថែមទៀតមុនពេលពួកគេអាចគិតអំពីការប្រកួតប្រជែងយកជើងឯក Premier League ជាមួយក្រុមដទៃ។

ជុំវិញរឿងនេះ គ្រូបង្វឹក វ័យ៤៤ឆ្នាំ បានអោយដឹងថា “យើងមិនទាន់បានត្រៀមខ្លួនជាស្រេចក្នុងការប្រកួតប្រជែងជាមួយក្រុមធំៗដទៃទៀតដូចជា Liverpool, Arsenal និង Manchester City ដោយសារហេតុផលជាច្រើន។ បើទោះជាយើងមានលទ្ធផលល្អប៉ុន្មានប្រកួតមកនេះ ប៉ុន្តែខ្ញុំនឹងមិនផ្លាស់ប្តូរគំនិតរបស់ខ្ញុំទេ។ យើងមិនទាន់បានត្រៀមខ្លួនរួចជាស្រេចសម្រាប់រឿងនោះទេ។ ប៉ុន្តែអ្វីដែលល្អគឺយើងកំពុងកែលម្អក្រុមរបស់យើង ហើយសង្ឃឹមថាឆាប់ៗនេះយើងអាចឈានដល់កម្រិតនោះបាន។”

ឆ្លងកាត់ ១៣ ប្រកួតនៅលីគកំពូលអង់គ្លេស ២០២៤-២៥ នេះ លោក Enzo Maresca បានដឹកនាំ Chelsea ទទួលលទ្ធផល ឈ្នះ ៧ ស្មើ ៤ ចាញ់២ ដែលបានធ្វើអោយពួកគេឡើងទៅឈរលេខ៣ ក្នុងតារាងពិន្ទុ មាន ២៥ពិន្ទុ ស្មើពិន្ទុ ក្រុមលេខ២ Arsenal និងតិចជាង ៩ពិន្ទុពីក្រុមកំពូលតារាង Liverpool។ ដោយឡែក Chelsea នឹងមានការប្រកួតប្រជែង Premier League ដ៏ស្វិតស្វាញ នៅក្នុងខែធ្នូនេះ គឺពួកគេមានការប្រកួតចំនួន៦ប្រកួត ឯណោះ៕

អត្ថបទទាក់ទង