គ្រូ Man UTD ថា ក្រុមខ្លួនខ្វះគុណភាពទើបចាញ់ Nottingham Forest

Premier League
December 9th, 2024 (2 months)
236 Views
Share

គ្រូបង្វឹកលោក Ruben Amorim បានទទួលស្គាល់ថា Man UTD មានភាពខ្វះខាតដែលបណ្តាលអោយពួកគេប្រកួតចាញ់ក្រុម Nottingham Forest ហើយថា បញ្ហានេះមិនអាចដោះស្រាយបានក្នុងពេលឆាប់រហ័សនោះទេ។

ជាការពិត Man UTD ទើបតែប្រកួតចាញ់ Nottingham Forest ដោយលទ្ធផល ៣-២ នៅក្នុងជំនួបក្របខណ្ឌ Premier League កាលពីចុងសប្តាហ៍កន្លងទៅ។ ការប្រកួតនាកីឡដ្ឋាន Old Trafford នោះក្រុម Nottingham Forest បានរកគ្រាប់បាល់បើកឆាកតាំងពីនាទី២ ដោយ Nikola Milenković ប៉ុន្តែ Rasmus Højlund បានតាមសងស្មើអោយក្រុម Man UTD វិញ នៅនាទី១៨ មុនចប់វគ្គទី១។

នៅវគ្គទី២ Nottingham Forest បានបើកការនាំមុខសាជាថ្មីដោយគ្រាប់បាល់របស់ Morgan Gibbs-White ក្នុងនាទី ៤៧ហើយនាទី ៥៤ Chris Wood បានផ្តល់គ្រាប់បាល់ទី៣ សម្រាប់ក្រុមភ្ញៀវ។ នៅនាទី៦១ ក្រុមម្ចាស់ផ្ទះ Man UTD បានរកគ្រាប់ទី២ ដោយ Bruno Fernandes ខណៈលទ្ធផលនេះមិនមានការផ្លាស់ប្តូររហូតដល់ចប់ការប្រកួត។

នេះជាការបរាជ័យលើកទី២ជាប់គ្នាហើយនៅក្នុងការប្រកួតលីគកំពូលអង់គ្លេស របស់លោក Ruben Amorim ក្នុងនាមជាគ្រូបង្វឹកថ្មីរបស់ក្រុមបិសាចក្រហម បន្ទាប់ពីបានចាញ់ Arsenal ២-០ កាលពីពេលកន្លងទៅ ។ សម្រាប់ការបរាជ័យនេះដែរ បុរសជនជាតិព័រទុយហ្កាល់បានមើលឃើញពីភាពខ្វះខាតរបស់ក្រុម និងថា បញ្ហានេះ ត្រូវការរយៈពេលច្រើនដើម្បីដោះស្រាយ។

លោក Ruben Amorim បានអោយដឹងដូច្នេះ “វាជាការប្រកួតដ៏ស្វិតស្វាញ យើងចាប់ផ្តើមវគ្គទី២ពិតជាអាក្រក់។ ក្រុមរបស់យើងមិនមានគុណភាពច្រើនទេ ហើយបរិបទនេះពិតជាពិបាកណាស់។”

បុរសវ័យ ៣៩ឆ្នាំបន្តថា “យើងត្រូវការពេលវេលាបន្ថែមទៀតដើម្បីដោះស្រាយបញ្ហាដែលយើងកំពុងជួបប្រទះ ប៉ុន្តែយើងត្រូវយល់ថានេះជាដំណើរដ៏វែងឆ្ងាយ ហើយនោះជាអ្វីដែលការងាររបស់យើងតម្រូវអោយយើងស្វែងយល់ពីវា។”

សម្រាប់ការបរាជ័យនេះ បានធ្វើអោយ Man UTD រអិលចុះទៅ លេខ១៣ មាន ១៩ពិន្ទុ រីឯ Nottingham Forest វិញ នៅឈរលេខ៥ មាន ២៥ពិន្ទុ៕

អត្ថបទទាក់ទង