Chelsea បដិសេធអោយខ្សែការពារ Tosin Adarabioyo ចូលរួមជាមួយ West Ham

Premier League
December 13th, 2024 (7 months)
360 Views
Share

មានការរាយការណ៍ថា ក្លិប Chelsea បានសម្រេចចិត្តមិនអនុញ្ញាតអោយខ្សែការពារ Tosin Adarabioyo ចូលរួមជាមួយ West Ham United ក្នុងទីផ្សារដោះដូរកីឡាករខែមករានោះទេ។

កីឡាករអង់គ្លេស បានចូលរួមជាមួយ Chelsea ពី Fulham ក្នុងការផ្ទេរដោយមិនមានតម្លៃខ្លួនកាលពីរដូវក្តៅ ។
សម្រាប់ West Ham United ហាក់បីដូចជាមានការចាប់អារម្មណ៍លើការផ្លាស់ប្តូរមួយសម្រាប់ Adarabioyo ប៉ុន្តែគ្រូបង្វឹក Chelsea លោក Enzo Maresca ទំនងជាបានសម្រេចចិត្តយ៉ាងរហ័សថា លោកចង់រក្សាកីឡាករក្នុងក្រុមបច្ចុប្បន្ន ខណៈពួកគេកំពុងមានលទ្ធផលល្អប្រសើរ ។

West Ham អាចធ្វើបានយ៉ាងល្អក្នុងការបន្ថែម Adarabioyo ជាជម្រើសមួយផ្សេងទៀតនៅតំបន់ការពារខាងក្រោយបន្ទាប់ពីការចាប់ផ្តើមរដូវកាលដ៏ពិបាករបស់ពួកគេ ប៉ុន្តែវាហាក់ដូចជាក្រុមញញួរយក្សនឹងត្រូវរកមើលកីឡាករផ្សេងហើយ។

ការសម្រេចចិត្តរក្សាទុក Tosin Adarabioyo បានទទួលការពេញចិត្តពីអ្នកគាំទ្រ Chelsea ដើម្បីជាការរក្សាតុល្យភាពក្នុងក្រុមដែលមានការប្រកួតប្រជែងដ៏វែងឆ្ងាយ និង មមាញឹក។
ទោះបីជា កីឡាករវ័យ ២៧ ឆ្នាំ មិនបានលេងច្រើនសម្រាប់ Chelsea ក្នុងក្របខណ្ឌ Premier League ក៏ពិតមែន ប៉ុន្តែ រូបគេមានឱកាសកាន់តែច្រើននៅក្នុងការប្រកួត Europa Conference League ហើយនោះក្លាយជារឿងសំខាន់របស់គេ។

គ្រូបង្វឹកលោក Enzo Maresca នឹងមិនចង់ពឹងផ្អែកលើកីឡាករដដែលជារៀងរាល់ ២-៣ ថ្ងៃនោះទេ ដូច្នេះជម្រើសក្នុងការបង្វិលនៃការប្រើប្រាស់កីឡាករទៅមក អាចជាគន្លឹះក្នុងការរក្សាក្រុមរបស់លោកអោយនៅតែរឹងមាំ និងផ្ដោតលើការប្រជែងដណ្តើមពានរង្វាន់បាន។

កន្លងមកមានការជឿជាក់តិចណាស់ថា Chelsea អាចរក្សាការប្រកួតប្រជែងកម្រិតខ្ពស់បាន ប៉ុន្តែលទ្ធផលនារយៈកាលចុងក្រោយបានបង្ហាញថា ក្រុមតោខៀវ អាចប្រកួតប្រជែងជាមួយក្រុមធំៗដូចជា Liverpool, Arsenal និង Man City ហើយពួកគេមានឱកាសយ៉ាងពិតប្រាកដ។

Adarabioyo ប្រហែលជាមានតួនាទីលេងប្រសិនបើ ក្រុមត្រូវផ្តល់ពេលវេលាអោយខ្សែការពារផ្សេងទៀតបានសម្រាកក្នុងការប្រកួតពានរង្វាន់អឺរ៉ុបនៅពាក់កណ្តាលសប្តាហ៍ ខណៈដែលរូបគេក៏ជាជម្រើសបម្រុងដែលអាចទុកចិត្តបានក្នុងករណីមានរបួសឬការព្យួរ៕

អត្ថបទទាក់ទង