លោក David Coote នឹងមិនប្តឹងឧទ្ទរណ៍ចំពោះការបញ្ចប់តំណែងជាអាជ្ញាកណ្តាល Premier League ទេ

Premier League
December 25th, 2024 (1 year)
527 Views
Share

លោក David Coote អតីតមន្ត្រីអាជ្ញាកណ្តាលនៃក្របខណ្ឌ Premier League នឹងមិនធ្វើការប្តឹងឧទ្ធរណ៍ប្រឆាំងនឹងការបណ្តេញរូបលោក ចេញពីស្ថាប័នអាជ្ញាកណ្តាលបាល់ទាត់របស់អង់គ្លេស PGMOL ទេ។

បុរស វ័យ ៤២ ឆ្នាំបានកាត់ក្តីការប្រកួតដែល Liverpool ឈ្នះ ទល់នឹង Aston Villa ២-០កាលពីការប្រកួត Premier League សប្តាហ៍ទី១១។ លោកគឺជាមន្ត្រីអាជ្ញាកណ្តាលដែលមានបទពិសោធន៍ច្រើនមួយរូបរបស់ Premier League ហើយបានធ្វើជាអាជ្ញាកណ្តាលក្នុងការប្រកួតលីគកំពូលអង់គ្លេស ចាប់តាំងពីឆ្នាំ ២០១៨ មក ។ ទោះយ៉ាងណា វីដេអូបែកធ្លាយ ដែលត្រូវបានចែករំលែកហាក់ដូចជាសំដៅទៅលើការប្រកួតក្របខណ្ឌ Premier League ដែលលោក Coote ដឹកនាំការប្រកួតរវាង Liverpool និង Burnley ក្នុងខែកក្កដាឆ្នាំ ២០២០ ដែលបានបញ្ចប់ក្នុងលទ្ធផល ១-១ ។

លោក Klopp ដែលកាលណោះនៅកាន់តំណែងជាគ្រូបង្វឹក Liverpool បានរិះគន់លោក Coote បន្ទាប់ពីចប់ការប្រកួត ដោយនិយាយថា អាជ្ញាកណ្តាលមិនបានពិន័យកីឡាករដែលមានកំហុសចំពោះការជែងយកបាល់ពីកីឡាកររបស់ Liverpool។

ទោះយ៉ាងណាក្រោយមក មន្ត្រីអាជ្ញាកណ្តាលោក David Coote បែរជាមានវីដេអូ និយាយរិះគន់លោក Jurgen Klopp ថាជាមនុស្សក្រអឺតក្រទម និងបាននិយាយពាក្យមិនល្អអំពីលោក Jurgen Klopp ជាច្រើនដងទៀត។

ក្រោយបែកធ្លាយរឿងនេះ លោក David Coote ត្រូវបាន PGMOL ព្យួរការងារ និងត្រូវរងការស៊ើបអង្កេត ហើយក្រោយពីការដំណើរការការស៊ើបអង្កេតរួចរាល់ ក៏បានរកឃើញថា បុរសជនជាតិអង់គ្លេសរូបនេះ មានភាពមិនសមរម្យ និងមិនអាចបន្តការងារជាអាជ្ញាកណ្តាលបាល់ទាត់នៅអង់គ្លេសទៀតនោះទេ គឺត្រូវបានបញ្ចប់តំណែងតែម្តង។

ទោះយ៉ាងណា លោក David Coote មានសិទ្ធិប្តឹងឧទ្ធរណ៍ ចំពោះការសម្រេចចិត្តរបស់ PGMOL ប៉ុន្តែរូបលោកបានសម្រេចចិត្តមិនធ្វើដូច្នេះទេ ហើយក៏មិនបានបញ្ជាក់ពីហេតុផលដែលលោកសម្រេចមិនប្តឹងឧទ្ទរណ៍ដែរ។

ដោយឡែក បើទោះជាត្រូវបាន PGMOL បញ្ចប់តំណែងជាមន្ត្រីអាជ្ញាកណ្តាលបាល់ទាត់ក៏ពិតមែន ប៉ុន្តែលោក David Coote ក៏បន្តស្ថិតនៅក្រោមការស៊ើបអង្កេតដោយសមាគមបាល់ទាត់អង់គ្លេស FA និង សហព័ន្ធបាល់ទាត់អឺរ៉ុប UEFA ជុំវិញទង្វើរបស់លោកផងដែរ៕

អត្ថបទទាក់ទង