ក្លិប៣នៅ Premier League ប្រជែងគ្នានាំយកខ្សែប្រយុទ្ធ Dusan Vlahovic ពី Juventus

Premier League
January 9th, 2025 (2 weeks)
165 Views
Share

ក្លិបចំនួន៣នៅក្របខណ្ឌ Premier League ដែលមាន Manchester United, Chelsea និង Tottenham Hotspur ត្រូវបានរាយការណ៍ថា បានប្រជែងគ្នាក្នុងការចុះហត្ថលេខាលើខ្សែប្រយុទ្ធ Dusan Vlahovic របស់ក្លិបអ៊ីតាលី Juventus។

កីឡាករអន្តរជាតិសែបកំពុងមានអនាគតមិនច្បាស់លាស់ជាមួយ Juventus ដែលវានឹងក្លាយជាឱកាសរបស់គេសម្រាប់ការផ្ទេរទៅកាន់ក្របខណ្ឌ Premier League ហើយក្លិបនៅលីគកំពូលអង់គ្លេសទាំង៣ខាងដើមបានបង្ហាញចំណាប់អារម្មណ៍ទៅលើកីឡាកររូបនេះ។

Dusan Vlahovic មានភាពលេចធ្លោអំឡុងការលេងជាមួយ Fiorentina ពីឆ្នាំ ២០១៨-២២ ប៉ុន្តែ គុណផលរបស់គេហាក់ធ្លាក់ចុះបន្តិច ក្រោយការផ្ទេរមកកាន់ Juventus ហើយដូច្នេះសាមីកីឡាករមានបំណងស្តារអាជីពរបស់ខ្លួនឡើងវិញ តាមរយៈការស្វែងរកទ្រនំថ្មី។

បែបនេះក្តី សម្រាប់តម្លៃនៃការផ្ទេរកីឡាករវ័យ២៤ឆ្នាំ ត្រូវបានសារពត៌មាន Caught Offside លើកឡើងថា មិនមានតម្លៃថោកនោះទេ ដោយមានប្រមាណ ៦៥លានអឺរ៉ូឯណោះ។

សម្រាប់ក្លិប Manchester United ដែលចង់បាន Dusan Vlahovic ព្រោះពួកគេ ត្រូវការជម្រើសបន្ថែមក្នុងតំបន់ប្រយុទ្ធរបស់ក្រុម បន្ទាប់ពីក្រុមបិសាចក្រហមបានបង្កើតការចុះហត្ថលេខាមិនល្អក្នុងរយៈពេលថ្មីៗនេះ។

រីឯក្លិប Chelsea វិញ ទោះជាពួកគេមាន Nicolas Jackson ដែលមានភាពប្រសើរឡើងច្រើនក្នុងរដូវកាលនេះ ខណៈដែល Christopher Nkunku និង Marc Guiu ក៏ជាជម្រើសដែលមានសមត្ថភាពខ្លាំងក៏ដោយ ប៉ុន្តែពួកគេក៏ចង់បង្កើនជម្រើសប្រកួតប្រជែងក្នុងក្រុម។

ចំពោះ Tottenham Hotspur វិញ ហាក់មើលឃើញថា ជាក្លិបដែលត្រូវការ Dusan Vlahovic ខ្លាំងជាងគេ ព្រោះក្រុមមាន់ខ្នាយមាសកំពុងរងនូវរដូវកាលដ៏ពិបាកមួយ ដោយកីឡាករច្រើនរូបរងរបួស ហើយក្រុមប្រហែលជាពឹងផ្អែកខ្លាំងពេកទៅលើ Dominic Solanke ដូច្នេះក្រុមត្រូវការចែករំលែកបន្ទុកពីរូបគេ ដោយការស្វែងរកកីឡាករបន្ថែមទៀត៕

អត្ថបទទាក់ទង