ក្រោយឈ្នះ West Ham គ្រូ Chelsea ដាក់ក្តីសង្ឃឹមថាក្រុមស្ថិតក្នុងចំណាត់ថ្នាក់កំពូលទាំង៤ពេលចប់រដូវកាល

Premier League
February 4th, 2025 (5 months)
313 Views
Share

គ្រូបង្វឹក លោក Enzo Maresca បាននិយាយថា លោកនឹងដាក់ក្តីសង្ឃឹមថា ក្រុម Chelsea របស់លោកនឹងអាចស្ថិតក្នុងចំណាត់ថ្នាក់កំពូលទាំង៤ ពេលការប្រកួតក្របខណ្ឌ Premier League រដូវកាលនេះបញ្ចប់។

ជាការពិត ក្រុម Chelsea បានឡើងមកកាន់ចំណាត់ថ្នាក់លេខ៤វិញ ក្រោយវាយបកយកឈ្នះ West Ham United ដោយលទ្ធផល ២-១ នាកីឡដ្ឋាន Stamford Bridge កាលពីយប់មិញ។

ក្នុងការប្រកួតនោះក្រុមភ្ញៀវ West Ham United បាននាំមុខមុននៅក្នុងវគ្គទី១ ដោយ Jarrod Bowen ស៊ុតបញ្ចូលទីនៅនាទី ៤២។

យ៉ាងណា នៅក្នុងវគ្គទី២ ក្រុមម្ចាស់ផ្ទះ Chelsea បានប្រឹងប្រែងវាយសម្រុកហើយក៏តាមស្មើដោយ Pedro Neto ស៊ុតបញ្ចូលទី នៅនាទី ៦៤ មុនពេល Aaron Wan-Bissaka ភ្លាត់អោយបាល់ចូលទីខ្លួនឯងនៅនាទី ៧៤ ដើម្បីជួយ Chelsea ឈ្នះការប្រកួតនេះ។

ជាមួយនឹងជ័យជំនះនេះ គ្រូបង្វឹកលោក Enzo Maresca យល់ថា ក្រុម Chelsea មានការរីកចម្រើនច្រើន ហើយលោកក៏សង្ឃឹមដែរថា ក្រុមអាចធ្វើបានល្អតទៅទៀត និងអាចរក្សាចំណាត់ថ្នាក់កំពូលទាំង៤ ពេលចប់រដូវកាល។

លោក Enzo Maresca បាននិយាយក្រោយចប់ការប្រកួតបែបនេះ “ ខ្ញុំពិតជាសប្បាយចិត្តដែលឃើញក្រុមមានភាពរីកចម្រើន ហើយយើងបានមកដល់ចំណាត់ថ្នាក់ល្អមួយដូចដែលខ្ញុំចង់បាន។ ខ្ញុំសង្ឃឹមថា ពួកយើងនឹងអាចរក្សាចំណាត់ថ្នាក់កំពូលទាំង៤ ហើយវាជារឿងសំខាន់ដែលក្រុមយើងចង់សម្រេចបាន។”

ឆ្លងកាត់២៤ប្រកួតក្នុងក្របខណ្ឌ Premier League 2024-25 កន្លងមក ក្រុម Chelsea ឈ្នះ ១២ ស្មើ ៧ ចាញ់៥ មាន៤៣ពិន្ទុ ឈរក្នុងចំណាត់ថ្នាក់លេខ៤ ពីលើក្រុមលេខ៥ Man City ២ពិន្ទុ។ រីឯក្រុម West Ham United កំពុងឈរលេខ១៥ មាន ២៧ពិន្ទុ៕

អត្ថបទទាក់ទង