គ្រូ Man UTD បង្ហាញការព្រួយបារម្ភចំពោះរបួសរបស់ខ្សែការពារ Lisandro Martinez

Premier League
February 7th, 2025 (1 month)
177 Views
Share

គ្រូបង្វឹក Man UTD លោក Ruben Amorim បានបង្ហាញការព្រួយបារម្ភអំពីបញ្ហារបួសរបស់ ខ្សែការពារ Lisandro Martinez ដែលមានសភាពធ្ងន់ធ្ងរ។

ជាការពិត Lisandro Martinez បានរងរបួសរហែកសរសៃពួរជង្គង់ ACL ដែលធ្វើអោយគេត្រូវការពេលវេលាដើម្បីព្យាបាលរបួសនេះយ៉ាងហោចណាស់៦ខែ ទើបអាចត្រឡប់មកជួយក្រុមវិញបាន។ របួសរបស់កីឡាករអាហ្សង់ទីនបានកើតឡើងក្នុងការប្រកួតដែល Man UTD បានចាញ់ក្រោមថ្វីជើងរបស់ Crystal Palace ដោយលទ្ធផល ២-០ ក្នុងការប្រកួតក្របខណ្ឌ Premier League នៅកីឡដ្ឋាន Old Trafford កាលពីចុងសប្តាហ៍មុន។

ក្នុងការប្រកួតនោះ Lisandro Martinez បានព្យាយាមប្រជែងយកបាល់ជាមួយខ្សែប្រយុទ្ធរបស់ Crystal Palace ។ តាមការត្រួតពិនិត្យរបស់គ្រូពេទ្យរបស់ក្លិប បង្ហាញថា របួសនេះមានភាពធ្ងន់ធ្ងរ ដែលតម្រូវអោយគេត្រូវការពេលជាច្រើនខែដើម្បីព្យាបាល។

ទាក់ទិននឹងបញ្ហានេះ លោក Ruben Amorim បានចេញមកបង្ហាញការព្រួយបារម្ភអំពីស្ថានភាពកីឡាកររបស់ខ្លួនថា “ការវាយតម្លៃរបួសកំពុងបន្តដើម្បីកំណត់វគ្គនៃការព្យាបាលសមស្រប និងពេលវេលាសម្រាប់ការស្តារនីតិសម្បទារបស់ Lisandro Martinez។ គ្រប់គ្នានៅ Man UTD គាំទ្ររូបគេអោយមានកម្លាំងចិត្តក្នុងការតស៊ូព្យាបាលរបួស។ គេស្ថិតក្នុងភាពលំបាក តែយើងនឹងបន្តជួយរូបគេគ្រប់ជំហានជានិច្ច។”

វាជារឿងដ៏អាក្រក់មួយរបស់ Man UTD ខណៈដែលពួកគេកំពុងតែមានភាពដុនដាបផងហើយពេលនេះមកជួបបញ្ហារបួសនេះបន្ថែមទៀត ខណៈដែលកីឡាករវ័យ២៧ឆ្នាំនឹងត្រូវខកខានជួយក្រុមរហូតដល់ចប់រដូវកាលនេះតែម្ដង។

នៅតំបន់ស្លាបឆ្វេងនេះគេមិនទាន់ឃើញ Luke Shaw បានត្រឡប់មកជួយក្រុមវិញបាននៅឡើយទេ ខណៈដែលគិតមកដល់ពេលនេះចូល១ឆ្នាំទៅហើយដោយសារតែរបួស។
គិតមកដល់ពេលនេះ Man UTD កំពុងឈរនៅលេខរៀងទី១៣ ក្នុងតារាងពិន្ទុក្របខណ្ឌ Premier League ហើយនៅសល់១៤ប្រកួតទៀតសម្រាប់រដូវកាលនេះ៕

អត្ថបទទាក់ទង