Tottenham Hotspur បើកការពិភាក្សាកិច្ចសន្យាថ្មីជាមួយខ្សែបម្រើ Rodrigo Bentancur

Premier League
February 25th, 2025 (5 months)
258 Views
Share

ប្រភពពីសារព័ត៌មាន Daily Mail អោយដឹងថា ក្លិប Tottenham Hotspur បានបើកការពិភាក្សាជាមួយខ្សែបម្រើ Rodrigo Bentancur ជុំវិញការបន្តកិច្ចសន្យាថ្មី។

កីឡាករអន្តរជាតិអ៊ុយរូហ្គាយ ជាតួអង្គសំខាន់ក្នុងក្រុមរបស់គ្រូបង្វឹកលោក Ange Postecoglou ដែលបានបង្ហាញខ្លួនចំនួន ២៨ប្រកួត នៅរដូវកាលនេះ ទោះបីជាត្រូវបានព្យួរការប្រកួតក្នុងស្រុកចំនួន ៨ប្រកួត កាលពីឆ្នាំមុនសម្រាប់ការលើកឡើងដែលមានលក្ខណៈរើសអើងជាតិសាសន៍ទៅលើមិត្តរួមក្រុមខ្សែប្រយុទ្ធកូរ៉េខាងត្បូង Heung-Min Son ក្នុងបទសម្ភាសន៍មួយនៅក្នុងប្រទេសកំណើតរបស់គេក៏ដោយ។

កិច្ចសន្យាបច្ចុប្បន្នរបស់ Rodrigo Bentancur នឹងផុតកំណត់នៅចុងបញ្ចប់រដូវកាលក្រោយឯណោះ ប៉ុន្តែ Tottenham Hotspur បានបើកចំហរក្នុងការបន្តលក្ខខណ្ឌកិច្ចសន្យាថ្មីដល់អតីតសមាជិក Juventus រូបនេះ។

ជាក់ស្តែង ការពិភាក្សាបឋមលើកិច្ចព្រមព្រៀងថ្មីមួយកំពុងដំណើរការក្នុងគោលបំណងធានាអនាគតរយៈពេលវែងរបស់កីឡាករវ័យ ២៧ ឆ្នាំនៅកីឡដ្ឋាន Tottenham Hotspur Stadium ។

ការពិភាក្សាគឺស្ថិតក្នុងដំណាក់កាលដំបូងបំផុត ដោយមិនមានកិច្ចព្រមព្រៀងសម្រេចនៅឡើយទេ តែកិច្ចពិភាក្សាសំខាន់នានា ត្រូវបានគ្រោងទុកនៅប៉ុន្មានសប្តាហ៍ខាងមុខនេះ។

យ៉ាងណា ឆន្ទៈសំខាន់របស់ Tottenham Hotspur គឺចង់បន្តកិច្ចសន្យាបច្ចុប្បន្នរបស់ Rodrigo Bentancur ដោយផ្តល់តួនាទីអោយរូបគេជាកីឡាករក្រុមដំបូងដ៏សំខាន់។

អាជីពរបស់ Rodrigo Bentancur ជាមួយក្លិបនៅភាគខាងជើងទីក្រុងឡុងដ៍បានជួបបញ្ហាខ្លះៗដោយសាររបួស គឺរូបគេបានរងរបួសសរសៃពួរ ACL កាលពីខែកុម្ភៈ ឆ្នាំ ២០២៣ មុនពេលមានបញ្ហាសរសៃពួរកជើងនៅឆ្នាំដដែល។

ទោះជាយ៉ាងណាក៏ដោយ លោក Postecoglou នៅតែចាត់ទុក Rodrigo Bentancur ជាសមាជិកដ៏សំខាន់ក្នុងក្រុម ហើយនឹងចាប់អារម្មណ៍ចំពោះអនាគតដ៏យូរអង្វែងរបស់គេដែលនឹងត្រូវបានចងភ្ជាប់ជាមួយក្រុម៕

អត្ថបទទាក់ទង