ខ្សែការពារ Trevoh Chalobah ទំនងអវត្តមានការប្រកួត Chelsea ទល់ Southampton ក្រោយរងរបួស

Premier League
February 25th, 2025 (11 months)
544 Views
Share

ខ្សែការពារ Trevoh Chalobah ទំនងអវត្តមានការប្រកួតរបស់ Chelsea ទល់ Southampton នៅក្នុងជំនួបក្របខណ្ឌ Premier League ពាក់កណ្តាលសប្តាហ៍នេះ ក្រោយជួបបញ្ហារបួស។ នេះបើតាមការប្រកាសរបស់គ្រូបង្វឹកលោក Enzo Maresca ។

កីឡាករវ័យ២៥ឆ្នាំ បានរងរបួសក្នុងការប្រកួតដែល Chelsea ចាញ់ Aston Villa ដោយលទ្ធផល ២-១ នៅក្នុងជំនួបក្របខណ្ឌ Premier League នៅកីឡដ្ឋាន Villa Park កាលពីពេលកន្លងទៅ។ របួសរបស់ Trevoh Chalobah មិនមែនជារបួសធំដុំខ្លាំងទេ ប៉ុន្តែវាអាចធ្វើអោយគេត្រូវស្ថិតនៅក្រៅទីលានយ៉ាងហោចណាស់ ពី ៧ ទៅ ១០ ថ្ងៃដែរ។

ឈ្មោះរបស់ Trevoh Chalobah បានស្ថិតក្នុងបញ្ជីរបួសដ៏វែងរបស់ Chelsea ដែលរួមមាន Nicolas Jackson, Noni Madueke, Romeo Lavia និង Wesley Fofana ផងដែរ។

ជុំវិញបញ្ហារបួសរបស់ Trevoh Chalobah លោក Enzo Maresca បានអោយដឹងថា “ Trevoh Chalobah បានធ្វើការត្រួតពិនិត្យរួចហើយ ហើយគេត្រូវអវត្តមានច្រើនថ្ងៃ។ រឿងល្អនោះគឺរបួសរបស់គេ មិនមែនជារបួសត្រង់កន្លែងសំខាន់ ប៉ុន្តែរឿងអាក្រក់នោះ គឺយើងត្រូវបាត់បង់កីឡាករបន្ថែមទៀត ក្នុងកាលៈទេសៈដែលក្លិបកំពុងមានបញ្ហាកីឡាកររបួសច្រើននាក់ នាំអោយប៉ះពាល់ដល់ទម្រង់លេងរបស់ក្រុម។”

ចាញ់ Aston Villa នោះ គឺជាការបរាជ័យទី២ជាប់ៗគ្នារបស់ Chelsea ខណៈ៥ប្រកួតចុងក្រោយរបស់ក្រុមតោខៀវនៅក្របខណ្ឌ Premier League ពួកគេចាញ់ដល់ទៅ៣ដង ឈ្នះតែ២ដង។ Chelsea បច្ចុប្បន្នកំពុងស្ថិតនៅលេខ៧ក្នុងតារាងពិន្ទុក្របខណ្ឌ Premier League ដោយមាន៤៣ពិន្ទុ ឃ្លាតពីចំណាត់ថ្នាក់ កំពូលទាំង៤ ដែលកាន់កាប់ដោយ Man City តែ១ពិន្ទុ។ យ៉ាងណា Chelsea នៅតែមានសុទិដ្ឋិនិយមថា ពួកគេនឹងព្យាយាមប្រឹងប្រែង ហើយអាចបញ្ចប់រដូវកាលក្នុងចំណាត់ថ្នាក់កំពូលទាំង៤ ដែលមានកៅអីទៅកាន់ពានរង្វាន់ UEFA Champions League ។

ការប្រកួតទល់ Southampton នឹងក្លាយជាការសាកល្បងមួយទៀតរបស់ Chelsea ស្របពេលដែលក្រុមកំពុងមានបញ្ហាកីឡាកររបួសច្រើន រីឯ Southampton កំពុងមានភាពដុនដាបដោយស្ថិតនៅ បាតតារាងតែម្តង៕

អត្ថបទទាក់ទង