ខ្សែការពារ Calvin Bassey របស់ Fulham រងការរើសអើងជាតិសាសន៍តាមប្រព័ន្ធអនឡាញ

Premier League
March 4th, 2025 (11 months)
583 Views
Share

ក្លិប Fulham បានធ្វើការថ្កោលទោសការរើសអើងជាតិសាសន៍ និងការរំលោភបំពានតាមបណ្តាញអ៊ីនធឺណេត ដែលសំដៅទៅលើខ្សែការពារ Calvin Bassey បន្ទាប់ពីពួកគេបានឈ្នះការប្រកួតទៅលើ ក្រុម Man UTD នៅក្នុងពានរង្វាន់ FA Cup ជុំទី៥។

កីឡាករសញ្ជាតិនីហ្សេរីយ៉ា Calvin Bassey ដែលបានស៊ុតគ្រាប់បាល់បញ្ចូលទីគ្រាប់បើកឆាកនៅកីឡដ្ឋាន Old Trafford ដើម្បីផ្តល់ការនាំមុខដល់ Fulham បានបង្ហាញពីសារមួយចំនួននៃការរំលោភបំពានដែលរូបគេបានទទួលនៅលើប្រព័ន្ធផ្សព្វផ្សាយសង្គម។

ជុំវិញរឿងនេះ Fulham បាននិយាយនៅក្នុងសេចក្តីថ្លែងការណ៍មួយថា “យើងថ្កោលទោសយ៉ាងខ្លាំងចំពោះអាកប្បកិរិយាដ៏ស្អប់ខ្ពើមនេះ មិនថា នៅក្នុងបាល់ទាត់ ឬសង្គម ។ សកម្មភាពបែបនេះមិនអាចទទួលយកបានទាំងស្រុងទេ ហើយយើងគាំទ្រយ៉ាងពេញទំហឹងចំពោះ Calvin Bassey។ យើងនឹងធ្វើការជាមួយអាជ្ញាធរពាក់ព័ន្ធក្នុងការកំណត់អត្តសញ្ញាណជនល្មើសដែលបង្ហោះសារដ៏អាក្រក់ទាំងនេះ និងចាត់វិធានការខ្លាំងបំផុតប្រឆាំងនឹងពួកគេ។”

សម្រាប់ស្ថាប័ន Premier League វិញ ក៏បានថ្កោលទោសចំពោះរឿងនេះ និងអះអាងថា ពួកគេមានការរន្ធត់ចិត្តចំពោះការរំលោភបំពានទៅលើកីឡាករបាល់ទាត់ដែលកើនឡើង ជាលំដាប់។ Premier League នឹងធ្វើការជាមួយក្រុមហ៊ុនប្រព័ន្ធផ្សព្វផ្សាយសង្គម និងអាជ្ញាធរ ដើម្បីស្វែងរកអ្នកដែលប្រព្រឹត្តទង្វើដ៏គួរអោយស្អប់ខ្ពើមទាំងនោះ។

ការរំលោភបំពានជាតិសាសន៍តាមប្រព័ន្ធអនឡាញទៅលើ Calvin Bassey កើតឡើងបន្ទាប់ពីករណីថ្មីៗនេះទាក់ទងនឹងខ្សែបម្រើ Abdoulaye Doucoure របស់ Everton ខ្សែបម្រើ Joe Willock របស់ Newcastle United និងកីឡាការិនីខ្សែប្រយុទ្ធ Khadija Shaw របស់ក្រុមនារី Man City ។

នៅក្នុងបទសម្ភាសន៍ថ្មីៗនេះជាមួយ BBC Sport លោក Samuel Okafor នាយកប្រតិបត្តិនៃស្ថាប័នប្រឆាំងការរើសអើង KIO បាននិយាយថា កម្រិតនៃការរំលោភបំពាននៅក្នុងបាល់ទាត់អង់គ្លេសបានឈានដល់ចំណុចវិបត្តិគួរអោយព្រួយបារម្ភហើយ តម្រូវអោយមានចំណាត់ការជាបន្ទាន់ណាមួយ ដើម្បីដោះស្រាយបញ្ហានេះ៕

អត្ថបទទាក់ទង