ខ្សែការពារ Lewis Hall របស់ Newcastle United អាចអវត្តមានដល់ចប់រដូវកាល ព្រោះរបួសជើង

Premier League
March 7th, 2025 (4 months)
327 Views
Share

ខ្សែការពារ Lewis Hall របស់ Newcastle United អាចនឹងអវត្តមានការប្រកួតរហូតដល់ចប់រដូវកាល ព្រោះតែរូបគេបានជួបប្រទះរបួសជើង។

កីឡាករអង់គ្លេសបានមានបញ្ហារបួស អំឡុងការប្រកួតដែល Newcastle United ចាញ់ Liverpool ដោយលទ្ធផល ២-០ ក្នុងជំនួបក្របខណ្ឌ Premier League កាលពីចុងខែកុម្ភៈកន្លងទៅ។

អវត្តមានរបស់ Lewis Hall បានក្លាយជាការប៉ះទង្គិចមួយទៀតដល់ក្រុមរបស់គ្រូបង្វឹកលោក Eddie Howe ដោយខ្សែប្រយុទ្ធ Antony Gordon ត្រូវជាប់បម្រាមមិនអាចចូលលេងរួចទៅហើយ ខណៈដែលពួកគេនឹងត្រូវមានការប្រកួតធំមួយគឺនឹងប៉ះ Liverpool សាជាថ្មី ក្នុងពានរង្វាន់ EFL Cup វគ្គផ្តាច់ព្រ័ត្រ ដែលធ្វើឡើងនាសប្តាហ៍ក្រោយ។

ជុំវិញបញ្ហារបស់ Lewis Hall ខាងក្លិប Newcastle United បានចេញសេចក្តីថ្លែងការណ៍ថា “ កីឡាករ Lewis Hall នឹងត្រូវឆ្លងកាត់ការវះកាត់របួស ហើយបន្តការស្តារកាយសម្បទាទៀត។ គ្រប់គ្នាក្នុងក្លិប ជូនពររូបគេអោយទទួលជោគជ័យក្នុងការព្យាបាលរបួសនេះ។”

កីឡាករវ័យ២០ឆ្នាំ ត្រូវបានចាត់ទុកជាកីឡាករក្នុងក្រុមជម្រើសដំបូងជាទៀងទាត់ និងមានសារៈសំខាន់របស់ Newcastle United ដោយបានបង្ហាញខ្លួន គ្រប់ការប្រកួតនៅក្នុងក្របខណ្ឌ Premier League នៅក្នុងរដូវកាលនេះ។

Lewis Hall ស្ថិតក្នុងចំណោមខ្សែការពារឆ្វេងដ៏ឈានមុខរបស់ក្របខណ្ឌ Premier League ហើយគុណផលនេះ កំពុងជំរុញអោយគេទទួលការចាប់អារម្មណ៍ពីគ្រូបង្វឹកក្រុមបាល់ទាត់ជម្រើសជាតិអង់គ្លេសលោក Thomas Tuchel ដើម្បីបញ្ចូលឈ្មោះទៅក្នុងក្រុមសម្រាប់ការប្រកួតអន្តរជាតិនាពេលខាងមុខ។

ដោយឡែក Newcastle United កំពុងឈរនៅលេខរៀងទី៦នៅ Premier League មាន២ពិន្ទុតាមពីក្រោយ Chelsea ដែលឈរនៅលេខរៀងទី ៥ និងតិចជាង ៣ ពិន្ទុពីក្រុមលេខ ៤ Man City៕

អត្ថបទទាក់ទង