Liverpool សម្លឹងឃើញកីឡាករមួយរូបសម្រាប់ជំនួសខ្សែប្រយុទ្ធ Mohamed Salah

Premier League
March 10th, 2025 (4 months)
410 Views
Share

សារព័ត៌មាន Caught Offside បានរាយការណ៍អោយដឹងថា ក្លិប Liverpool បានសម្លឹងឃើញកីឡាករថ្មីសម្រាប់ជំនួសខ្សែប្រយុទ្ធ Mohamed Salah នោះគឺខ្សែប្រយុទ្ធ Kenan Yıldız របស់ក្លិប Juventus។

កិច្ចសន្យាចាស់របស់ Mohamed Salah កាន់តែជិតផុតកំណត់ហើយ ហើយមកដល់ពេលនេះក៏មិនមានការឈានដល់កិច្ចព្រមព្រៀងក្នុងការបន្តកិច្ចសន្យាថ្មី ដល់កីឡាករជនជាតិអេហ្ស៊ីបដែរ។

ស្របពេលដែលមិនមានដំណឹងពីការបន្តកិច្ចសន្យាថ្មីដល់ Mohamed Salah នោះ ស្រាប់តែមានការផ្សព្វផ្សាយអំពីគោលដៅថ្មីរបស់ Liverpool ដែលជាកីឡាករ Kenan Yıldız របស់ Juventus ទៅវិញ។

ក្លិបហង្សក្រហម មានត្រៀមប្រមាណ ៦៧លានផោន ក្នុងការចរចានាំយកកីឡាករមានទេពកោលស្យជនជាតិតួកគី ដោយចាត់ទុករូបគេ ជាអ្នកបន្តវេនវែងឆ្ងាយរបស់ Mohamed Salah ។

Kenan Yıldız មានកិច្ចសន្យាជាមួយJuventus រហូតដល់ ឆ្នាំ២០២៩ឯណោះ ដោយរូបគេកំពុងបង្កព្យុះភ្លៀងនៅក្នុងក្របខណ្ឌ Serie A។ កីឡាករវ័យ១៩ឆ្នាំ បានដុះដាលចេញពីថ្នាលយុវជនរបស់ Bayern Munich មុនបន្តទៅចូលរួមជាមួយថ្នាលយុវជន Juventus ក្នុងឆ្នាំ២០២២ និងបានវិវឌ្ឍន៍ខ្លួន មកកាន់ក្រុមឈុតធំបានយ៉ាងឆាប់រហ័ស។

Yildiz បានបង្ហាញខ្លួនជាលើកដំបូងនៅក្របខណ្ឌ Serie A កាលពីខែសីហាឆ្នាំ២០២៣ ហើយបានបង្កើតប្រវត្តិសាស្ត្រក្លាយជាកីឡាករស៊ុតបញ្ចូលទីបរទេសក្មេងបំផុតមិនធ្លាប់មានរបស់ Juventus នៅក្នុងការប្រកួតលីគ។

សមត្ថភាពរបស់គេជាមួយ Juventus បានបន្តលេចធ្លោនៅក្នុងការប្រកួតតំបន់អ៊ឺរ៉ុប ពេលដែលគេបានស៊ុតបញ្ចូលទីគ្រាប់ដំបូងរបស់ខ្លួនក្នុងពានរង្វាន់ UEFA Champions League បំបែកកំណត់ត្រាខ្សែប្រយុទ្ធ Alessandro Del Piero ថែមទៀត។

រដូវកាលនេះ Yildiz បានស៊ុតបញ្ចូលទី ៦ គ្រាប់ និងបញ្ជូនបាល់អោយមិត្តរួមក្រុមចំនួន ៤ លើកក្នុងការបង្ហាញខ្លួន៤១ លើកនៅគ្រប់ការប្រកួតទាំងអស់។ ជំនាញបច្ចេកទេស ល្បឿន និងភាពច្នៃប្រឌិតរបស់ Yildiz ធ្វើអោយគេ ក្លាយជាការរំពឹងទុកដ៏ត្រឹមត្រូវសម្រាប់ប្រព័ន្ធវាយប្រយុទ្ធរបស់ Liverpool ក្រោមការដឹកនាំរបស់គ្រូបង្វឹកលោក Arne Slot ។ Liverpool កំពុងតាមដានស្ថានការណ៍របស់ Kenan Yıldız យ៉ាងដិតដល់ ប៉ុន្តែត្រូវប្រឈមមុខនឹងការប្រកួតប្រជែងពីក្លិបនៅ Premier League ផ្សេងទៀត រួមទាំង Man City ដែលត្រៀមខ្លួនជាស្រេចដើម្បីទិញយករូបគេផងដែរ៕

អត្ថបទទាក់ទង