ខ្សែការពារ Daniel Munoz របស់ Crystal Palace រងបណ្តឹងពីអតីតភ្នាក់ងាររបស់ខ្លួន

Premier League
March 21st, 2025 (4 weeks)
452 Views
Share

ខ្សែការពារស្តាំ Daniel Munoz របស់ក្លិប Crystal Palace បានជាប់ពាក់ព័ន្ធក្នុងបញ្ហាផ្លូវច្បាប់ ដោយអតីតភ្នាក់ងាររបស់គេ លោក Ruben Caicedo បានដាក់ពាក្យប្តឹងកីឡាករ និងភ្នាក់ងារ Juan Pablo Angel ជុំវិញការមិនបង់ថ្លៃកម្រៃជើងសារ ជុំវិញការផ្លាស់ប្តូរ របស់ Munoz ទៅកាន់ក្លិបនៅ Premier League ។

កីឡាករកូឡុំប៊ី វ័យ២៨ឆ្នាំ ដែលបានចូលរួមជាមួយ Crystal Palace ពីក្លិបបែលហ្ស៊ិក Genk ក្នុងខែមករា ឆ្នាំ២០២៤ តម្លៃ៨លានអឺរ៉ូ កំពុងប្រឈមនឹងការទាមទារកម្រៃជើងសារតាមផ្លូវច្បាប់ដែលមានចំនួនជិត១លានផោន។ ប្រភពពីសារពត៌មាន Marca អោយដឹងថា លោក Caicedo បានទាក់ទង Daniel Munoz ដំបូងនៅដើមខែមករាឆ្នាំ ២០២៣ ពេលរូបគេនៅលេងអោយ Genk ។ Munoz បានបង្ហាញពីបំណងចង់ផ្លាស់ទៅ Crystal Palace នឹងបានសុំអោយលោក Caicedo ចាត់ចែងលើការងារនេះ។

លោក Caicedo អះអាងថា លោកបានដើរតួនាទីយ៉ាងសំខាន់ក្នុងការជួយសម្រួលដល់ការផ្លាស់ប្តូរ ប៉ុន្តែក្រោយមកកម្រៃជើងសាររបស់លោកបែរជាមិនត្រូវបានផ្តល់អោយ បន្ទាប់ពីភ្នាក់ងារលោក Juan Pablo Angel កាន់ការងារបន្តពីលោក ។ ភ្នាក់ងារលោកលោក Ruben Caicedo បានចោទប្រកាន់ថា នៅពេលដែលការផ្ទេរត្រូវបានបញ្ចប់ លោករំពឹងថានឹងទទួលបានចំណែកដែលបានព្រមព្រៀងគ្នាជាមួយកីឡាករ ប៉ុន្តែការបង់ប្រាក់មិនសម្រេចបានឡើយ។

ដោយឡែក នាយកផ្នែកកីឡារបស់ក្លិប Crystal Palace លោក Dougie Freedman បានប្រាប់លោក Caicedo ថាកម្រៃជើងសារ បានផ្តល់ទៅអោយភ្នាក់ងារថ្មីរបស់ Daniel Munoz គឺ លោក Juan Pablo Angel ។ ដោយមិនមានដំណោះស្រាយនោះ ទេ លោក Caicedo បានចាត់វិធានការតាមផ្លូវច្បាប់។

ទោះបីជាមានភាពចម្រូងចម្រាសនៅក្រៅទីលានក៏ដោយ Daniel Munoz បានក្លាយជាកីឡាករដ៏លេចធ្លោសម្រាប់ Crystal Palace ។ ចាប់តាំងពីមកដល់ទឹកដី Selhurst Park រូបគេ បានបង្ហាញខ្លួនក្នុងការប្រកួតចំនួន ៤៨ដង នៅគ្រប់ការប្រកួតទាំងអស់ ដោយស៊ុតបញ្ចូលទីបាន ៥ គ្រាប់ និងបញ្ជូនបាល់អោយមិត្តរួមក្រុមចំនួន ៥ ដង។ ទម្រង់លេងដ៏គួរអោយចាប់អារម្មណ៍របស់ Daniel Munoz ថែមទាំងបានទាក់ទាញចំណាប់អារម្មណ៍ពីក្លិបធំៗនៅ Premier League ដែលរួមមានទាំង Man City ផងដែរ។

ខណៈដែលទម្រង់លេងនៅលើទីលានមានការកត់សម្គាល់នោះ Daniel Munoz បែរជាត្រូវប្រឈមមុខនឹងការតស៊ូផ្នែកច្បាប់ដ៏សំខាន់ដែលអាចប៉ះពាល់ដល់អនាគតរបស់គេ។ ជាមួយនឹងករណីនេះនៅក្នុងតុលាការ ទាំងសាមីកីឡាករ និងអ្នកតំណាងរបស់គេនឹងត្រូវដោះស្រាយអោយបានឆាប់រហ័ស ដើម្បីជៀសវាងការរំខានបន្ថែមទៀតអំឡុងការប្រកបអាជីពរបស់គេជាមួយ Crystal Palace ៕

អត្ថបទទាក់ទង