គ្រូ Man City ថា សោកស្តាយដែលរបូតឱកាសឈ្នះ Man UTD

Premier League
April 7th, 2025 (1 year)
622 Views
Share

ជំនួបដ៏ធំប្រចាំសប្តាហ៍នៃក្របខណ្ឌ Premier League គឺជាការប្រកួត Manchester Derby រវាង Man City និង Man UTD បានបញ្ចប់ហើយ តែក្រុមទាំង២ស្មើគ្នា ក្នុងលទ្ធផល ០-០។

ស្ថិតិនៃការប្រកួតនាកីឡដ្ឋាន Old Trafford ក្រុមម្ចាស់ផ្ទះ Man UTD អាចគ្រប់គ្រងបាល់បានតែ ៤១ភាគរយ តែមានឱកាសស៊ុត ១៣ដង ខណៈ ក្រុមភ្ញៀវ Man City មានឱកាសស៊ុត ៩ដង។

យ៉ាងណា ក្រុមទាំងសងខាងមិនអាចមានសំណាងស្វែងរកគ្រាប់បាល់ពីសំណាញ់ទីគ្នាបាននោះទេ ទោះជាបានប្រឹងប្រែងវាយសម្រុកយ៉ាងណាក្តី។ ភាពស្ងប់ស្ងាត់នេះ បានបន្តពេញ៩០នាទី រហូតដល់ចប់ការប្រកួត។

ជាមួយលទ្ធផលស្មើគ្នានេះ បានធ្វើអោយ គ្រូបង្វឹក Man City លោក Pep Guardiola បង្ហាញនូវការសោកស្តាយ ព្រោះរបូតឱកាសទទួលបានពិន្ទុបន្ថែម។ បុរសជនជាតិអេស្ប៉ាញ ទទូចថារូបលោកពិតជាចង់ទទួលជ័យជំនះនៅកីឡដ្ឋាន Old Trafford ប៉ុន្តែនឹងទទួលយកមួយពិន្ទុ ព្រោះក្រុមបានប្រឹងប្រែងអស់ពីលទ្ធភាពត្រឹមនេះ។

លោក Pep Guardiola បានអោយដឹងក្រោយចប់ការប្រកួតយ៉ាងដូច្នេះ “ ប្រាកដណាស់វានឹងល្អប្រសិនបើយើងបានឈ្នះ ជាជាងលទ្ធផលស្មើគ្នា។ នៅ Old Trafford យើងត្រូវការអ្វីដែលខ្លាំងជាងនេះ បើសិនយើងចង់ឈ្នះ។ យើងបានព្យាយាមបង្កើតឱកាសហើយព្យាយាមគ្រប់គ្រងស្ថានការណ៍ តែគូប្រជែងរបស់យើងក៏មានគ្រោះថ្នាក់ដែរ បើសិនយើងធ្វេសប្រហែស។ យើងក៏រីករាយហើយ ដោយយើងមិនបានចាញ់ការប្រកួត។”

គ្រូបង្វឹកវ័យ៥៤ឆ្នាំ ក៏បានអះអាងពីការបានឃើញរឿងរ៉ាវល្អៗជាច្រើន ក្នុងប៉ុន្មានប្រកួតចុងក្រោយរបស់ក្រុម បានលើកទឹកចិត្តអោយកីឡាករទទួលយកលទ្ធផល នឹងប្រឹងប្រែងដើម្បីប្រកួតក្រោយៗទៀត។

ចែកគ្នា១ពិន្ទុនេះ Man City បានរបូតឱកាសនៅចំណាត់ថ្នាក់កំពូលទាំង៤ ដោយបច្ចុប្បន្ន ពួកគេកំពុងឈរលេខ ៥ មាន៥២ពិន្ទុ ក្រោយឆ្លងកាត់៣១ប្រកួត។ រីឯ Man UTD វិញ នៅលេខ១៣ មាន ៣៨ពិន្ទុ ក្រោយឆ្លងកាត់ ៣១ប្រកួតដូចគ្នា៕

អត្ថបទទាក់ទង