Man City បង្កកការដំឡើងថ្លៃសំបុត្រសម្រាប់អ្នកគាំទ្រក្នុងរដូវកាល ២០២៥-២៦

Premier League
April 10th, 2025 (1 week)
161 Views
Share

Man City បានសម្រេចបង្កកការដំឡើងតម្លៃសំបុត្រសម្រាប់ពេញមួយរដូវកាល និងតម្លៃសំបុត្រទិញសម្រាប់តែថ្ងៃប្រកួតក្នុងយុទ្ធនាការ ២០២៥-២៦ បន្ទាប់ពីការពិភាក្សាជាមួយក្រុមប្រឹក្សាយោបល់របស់អ្នកគាំទ្ររួចមក។

ក្លិបមេឃខៀវ បានបើកកិច្ចប្រជុំវិសាមញ្ញមួយ ហើយនិយាយថាការសម្រេចចិត្តនេះធ្វើឡើងបន្ទាប់ពីការសន្ទនាវិជ្ជមាន ជាមួយក្រុមប្រឹក្សាភិបាលក្នុងរយៈពេលប៉ុន្មានសប្តាហ៍ថ្មីៗនេះ។

អ្នកតំណាងមួយចំនួនរបស់ក្រុមប្រឹក្សាយោបល់របស់អ្នកគាំទ្រ Man City ដែលមានឈ្មោះថា City Matters បានធ្វើកូដកម្មកាលពីខែមីនា ដោយសារក្លិបមិនបានចូលរួមក្នុងការពិភាក្សាអំពីតម្លៃសំបុត្ររដូវកាលក្រោយ។ កូដកម្មនោះបានធ្វើឡើងក្រោយលិខិតចំហរមួយផ្ញើទៅកាន់ប្រធានក្លិប Man City លោក Khaldoon al-Mubarak ដោយក្រុមអ្នកគាំទ្រចំនួន៧ក្រុម បានត្អូញត្អែរអំពីការកើនឡើងតម្លៃសំបុត្រ និងការរំពឹងទុក ចង់អោយក្លិបពិចារណាបញ្ហានេះ។

ទាក់ទិននឹងរឿងនេះដែរ Man City បាននិយាយថា “ក្លិបសូមថ្លែងអំណរគុណចំពោះតំណាងអ្នកគាំទ្រសម្រាប់មតិកែលម្អ លើប្រធានបទជាច្រើនទាក់ទងនឹងការលក់សំបុត្រ និងសម្រាប់ការចែករំលែកទស្សនៈទូលំទូលាយពីអ្នកគាំទ្រដែលពួកគេតំណាងអោយ។”

ការប្រកាសនេះធ្វើឡើងបន្ទាប់ពីការរិះគន់របស់អ្នកគាំទ្របន្ថែមទៀតសម្រាប់ការយល់ព្រមលើភាពជាដៃគូជាសកលជាមួយគេហទំព័រលក់សំបុត្រ Viagogo ។

កន្លងទៅ Man City ត្រូវបានអ្នកគាំទ្រចោទប្រកាន់ថា មិនអើពើចំពោះសំណើពិចារណាតម្លៃសំបុត្រ ហើយតម្លៃសំបុត្រស្តង់ដារអាចត្រូវបានលក់ក្នុងតម្លៃខ្ពស់ជាងមុន។ អ្នកគាំទ្របានតវ៉ាប្រឆាំងនឹងកិច្ចព្រមព្រៀងនេះ ដោយការជួបជុំគ្នាក្នុងបរិវេណកីឡដ្ឋាន Etihad ៩នាទីដំបូងនៃការប្រកួតក្របខណ្ឌ Premier League កាលសប្តាហ៍មុនទល់នឹង Leicester City ។

យ៉ាងណា Man City អះអាងថាសំបុត្រដែលលក់នៅលើគេហទំព័រ Viagogo គឺដើម្បីបែងចែកសំបុត្របដិសណ្ឋារកិច្ចដែលមានស្រាប់ នឹងត្រូវកំណត់តម្លៃថេរ ហើយមិនទាក់ទងការចងដំឡើងតម្លៃសំបុត្រនោះទេ៕

អត្ថបទទាក់ទង