ខ្សែបម្រើ Moises Caicedo របស់ Chelsea ត្រូវបានប៉ូលីសអង់គ្លេសឃាត់រថយន្តទុក

Premier League
April 11th, 2025 (1 week)
248 Views
Share

ខ្សែបម្រើ Moises Caicedo របស់ Chelsea ត្រូវបានប៉ូលីសអង់គ្លេស ឃាត់រថយន្តរបស់គេ ទុក បន្ទាប់ពីរូបគេត្រូវបានសង្ស័យថា បានបើកបរដោយគ្មានអាជ្ញាប័ណ្ណត្រឹមត្រូវ។ នេះបើតាមការផ្សព្វផ្សាយពីសារពត៌មាន BBC។

កីឡាករអន្តរជាតិអេក្វាឌ័រ វ័យ២៣ឆ្នាំ ត្រូវបានប៉ូលីសឃាត់រថយន្ត កាលពីពេលថ្មីៗនេះ នៅពេលដែលរូបគេធ្វើដំណើរទៅហ្វឹកហាត់ជាមួយ Chelsea នៅក្នុងតំបន់ Cobham ។

អ្នកនាំពាក្យប៉ូលីស អង់គ្លេស បាននិយាយថា “Moises Caicedo ត្រូវបានបញ្ឈប់ដោយមន្រ្តីប៉ូលីសនៅលើផ្លូវ Fairmile Lane ក្នុងតំបន់ Cobham ហើយត្រូវបានគេរកឃើញថាកំពុងបើកបរដោយគ្មានអាជ្ញាប័ណ្ណ។ រថយន្តត្រូវបានរឹបអូស ហើយការស៊ើបអង្កេតកំពុងបន្តធ្វើឡើង។”

សម្រាប់បញ្ហាដែលកើតឡើងទៅលើ Moises Caicedo ខាងក្លិប Chelsea មិនបានធ្វើអត្ថាធិប្បាយអ្វីនោះទេ។

ប្រសិនបើមន្ត្រីប៉ូលីសរកឃើញថា Moises Caicedo បានប្រព្រឹត្តបទល្មើសពិតមែន នោះរូបគេអាចប្រឈមមុខនឹងការផាកពិន័យ ឬការកាត់ទោសព្រហ្មទណ្ឌ។

Moises Caicedo បានផ្លាស់ទៅប្រទេសអង់គ្លេសនៅពេលដែលរូបគេត្រូវបានចុះហត្ថលេខាដោយ Brighton ពីក្លិប Independiente del Valle ក្នុងឆ្នាំ ២០២១ ។

Chelsea បានចុះហត្ថលេខាទិញយកកីឡាកររូបនេះ ក្នុងតម្លៃ ១០០ លានផោន ក្នុងខែសីហា ឆ្នាំ ២០២៣ ជាមួយកិច្ចព្រមព្រៀងដែលអាចកើនឡើងដល់ ១១៥លានផោន៕

អត្ថបទទាក់ទង