គ្រូ Paris St Germain ថា ក្រុមខ្លួនមានភាពរីកចម្រើនខ្លាំងក្រោយឈ្នះ Arsenal យប់មិញ

Premier League
April 30th, 2025 (3 weeks)
971 Views
Share

លោក Luis Enrique គ្រូបង្វឹក Paris Saint Germain បានលើកឡើងថា កូនក្រុមខ្លួនមានភាពរីកចម្រើនជាងមុន ក្រោយពីពួកគេបានយកឈ្នះ Arsenal នៅក្នុងជំនួបជើងទី១ វគ្គ៤ក្រុមចុងក្រោយពានរង្វាន់ UEFA Champions League កាលពីយប់មិញ។

Paris Saint Germain បានយកឈ្នះ Arsenal ក្នុងការប្រកួតដែលធ្វើឡើងនាកីឡដ្ឋាន Emirates ដោយលទ្ធផល ១-០ ដោយការស៊ុតតែ១គ្រាប់គត់ពីសំណាក់ខ្សែបម្រើ Ousmane Dembélé នៅក្នុងនាទី៤នៃវគ្គទី១។

វាជាការជួបគ្នាសាជាថ្មីរវាងក្រុមទាំង ២ ក្នុងពានរង្វាន់ UEFA Champions League រដូវកាលនេះ។ មុនឈានដល់វគ្គនេះ Paris Saint Germain ធ្លាប់ចាញ់ Arsenal ២-០ អំឡុងវគ្គសន្សំពិន្ទុ League Phase កាលពីខែតុលាឆ្នាំ២០២៤ ដោយកាលនោះ ក្រុមបារាំងពុំសូវមានទម្រង់លេងល្អប៉ុន្មានឡើយ។

យ៉ាងណា នៅរយៈពេលចុងក្រោយ Paris Saint Germain កាន់តែមានទម្រង់លេងល្អខ្លាំងឡើង ដោយនៅមុនពេលពួកគេលើកពាន Ligue 1 ក្រុមស្ថិតក្រោមការដឹកនាំរបស់លោក Luis Enrique បានទម្លាក់ជើងខ្លាំង Liverpool នៅវគ្គ ១៦ក្រុមចុងក្រោយ និង Aston Villa វគ្គ ៨ក្រុមចុងក្រោយ។ ពេលវិលមកជួប Arsenal វិញ Paris Saint Germain ក៏បានយកឈ្នះវិញទៀត។

ជាមួយលទ្ធផលល្អនេះ គ្រូបង្វឹកជនជាតិអេស្ប៉ាញ លោក Luis Enrique បានសរសើរកូនក្រុមរបស់ខ្លួនមានភាពរីកចម្រើនខ្លាំងជាងការប៉ះគ្នាលើកមុន ដោយបានលើកឡើងដូច្នេះ “នោះវាជារឿងកាលពី ៧ និង ៨ខែមុន ខ្ញុំបានមើលឃើញពីការប្រកួតនេះម្តងទៀត យើងគឺមានភាពរីកចម្រើនជាងមុន ហើយយើងកំពុងតែមានក្រុមល្អបំផុតមួយពេលនេះ។ យើងបានជួបប្រទះការប្រកួតដ៏តានតឹងកន្លងមក ជាមួយការប្រកួតជាច្រើនប្រៀបបាននឹងវគ្គផ្តាច់ព្រ័ត្រ ដូច្នេះខ្ញុំគិតថាវាបានធ្វើអោយរឿងខ្លះពិបាក ព្រោះយើងស្ថិតក្នុងស្ថានភាពលំបាកនោះ ប៉ុន្តែវាក៏បានធ្វើអោយយើងរឹងមាំ និងជោគជ័យជាងមុន។”

ក្រុមទាំង២នៅជួបគ្នាម្តងទៀត ក្នុងការប្រកួតជើងទី២ នាកីឡដ្ឋាន Parc des Princes របស់ Paris Saint Germain វិញម្តង នាថ្ងៃទី៧ ខែឧសភា ខាងមុខ៕

អត្ថបទទាក់ទង