Chelsea ត្រូវបានអនុញ្ញាតឱ្យទិញលក់កីឡាករឡើងវិញ

Premier League
May 31st, 2022 (3 years)
930 Views
Share

ទីបំផុត អ្នកចាត់ការរបស់ក្រុម Chelsea លោក Thomas Tuchel អាចចាប់ផ្តើមរៀបចំផែនការសម្រាប់អនាគតរបស់ពួកគេ បន្ទាប់ពីលោក Todd Boehly បានក្លាយជាម្ចាស់ក្លិបថ្មីជាផ្លូវការ កាលពីថ្ងៃចន្ទ ទី៣០ ខែឧសភា ឆ្នាំ២០២២។

លោក Boehly និងក្រុមហ៊ុនរបស់គាត់ បានទិញក្នុងតម្លៃ ៤,២៥ ពាន់លានផោន ដើម្បីគ្រប់គ្រងក្លិបពីអតីតម្ចាស់ ដែលជាជនជាតិរុស្ស៊ី ពោលគឺលោក Roman Abramovich ។

តម្លៃលក់គឺ ២,៥ពាន់លានផោន ខណៈដែលកិច្ចព្រមព្រៀង បានកំណត់ថា ទឹកប្រាក់ចំនួន ១,៧៥ ពាន់លានផោនទៀត នឹងត្រូវប្រើប្រាស់សម្រាប់ការវិនិយោគក្នុងរយៈពេល ១០ឆ្នាំ។

ចំណែក លោក Abramovich មិនទាមទារប្រាក់ ២,៥ ពាន់លានផោននោះទេ ដោយវានឹងត្រូវបានបរិច្ចាគទៅមូលនិធិសប្បុរសធម៌ថ្មីមួយ ដើម្បីជួយជនរងគ្រោះក្នុងសង្គ្រាមនៅអ៊ុយក្រែន។

លោក Abramovich ត្រូវបានរដ្ឋាភិបាលអង់គ្លេសដាក់ទណ្ឌកម្ម កាលពីថ្ងៃទី១០ ខែមីនា។ វាបានធ្វើឱ្យលោក Abramovich មិនអាចរកប្រាក់ចំណេញពីការលក់ Chelsea បានទេ។

Chelsea ត្រូវបានផ្តល់អាជ្ញាបណ្ណពិសេសដើម្បីអនុញ្ញាតឱ្យពួកគេបន្តប្រតិបត្តិការ ប៉ុន្តែវាបានភ្ជាប់មកជាមួយលក្ខខណ្ឌសំខាន់ៗ រួមទាំងការរឹតត្បិតលើចំណាយ និងការលក់សំបុត្រ។ ជាលទ្ធផល Chelsea មិនត្រូវបានអនុញ្ញាតឱ្យទិញ-លក់ ឬផ្តល់កិច្ចសន្យាថ្មីដល់កីឡាករណាមួយឡើយ។ ប៉ុន្តែការចូលកាន់តំណែងរបស់ម្ចាស់ក្លិបថ្មី កាល ពីថ្ងៃចន្ទ មានន័យថា ក្លិបអាចចាប់ផ្តើមដំណើរការជាប្រក្រតីឡើងវិញ ដូចពេលមុនការដាក់ទណ្ឌកម្ម។

Chelsea នឹងមានសេរីភាពក្នុងការលក់ និងចុះហត្ថលេខាលើកីឡាករក្នុងអំឡុងពេលទីផ្សារដោះដូរកីឡាកររដូវក្តៅ៕

អត្ថបទទាក់ទង