×

Liverpool យកឈ្នះ Ajax ចុងម៉ោង ខណៈ Spurs ចាញ់ Sporting ចុងម៉ោង

ការតែតបាល់បញ្ចូលទីចុងម៉ោងរបស់ Joel Matip ទល់នឹង Ajax នៅកីឡដ្ឋាន Anfield បានជួយឱ្យ Liverpool ទទួលបានជ័យជម្នះក្នុងការប្រកួតពានរង្វាន់ Champions League ជាលើកដំបូងរបស់ពួកគេក្នុងរដូវកាលនេះ។

ក្រុមរបស់អ្នកចាត់ការ Jurgen Klopp បានវិលត្រឡប់ពីការបរាជ័យ 4-1 នៅលើទឹកដីក្រុម Napoli ក្នុងការប្រកួតបើកឆាកពូលរបស់ពួកគេ។

ក្នុងវគ្គទីមួយ Mohamed Salah បានស៊ុតបញ្ចូលទីពីការបញ្ជូនរបស់ Diogo Jota នៅនាទីទី 17 ។ ប៉ុន្តែ ការនាំមុខរបស់ Liverpool បានត្រឹមតែ 10 នាទីប៉ុណ្ណោះ នៅពេលដែល Mohammed Kudus ស៊ុតតាមស្មើឱ្យក្រុម Ajax ។

ក្នុងវគ្គទីពីរ Matip បានតែតបញ្ចូលទីគ្រាប់បាល់ជ័យជម្នះ នៅពេលសល់ 1 នាទីចុងក្រោយនៃការប្រកួត ដែលជាគ្រាប់បាល់សម្រេចផ្ដល់ជូនដោយបច្ចេកវិទ្យា Goal-line ។

ចំណែក ក្រុម Tottenham Hotspur បានបណ្តោយឱ្យមានគ្រាប់បាល់បញ្ចូលទីពីរគ្រាប់នៅចុងម៉ោងនៃវគ្គទីពីរ ក្នុងការប្រកួតពានរង្វាន់ Champions League ទល់ នឹងម្ចាស់ផ្ទះ Sporting Lisbon មួយផ្សេងទៀត។

Spurs មានឱកាសល្អជាច្រើន ប៉ុន្តែមិនអាចធ្វើបានសម្រេចទេ។ យ៉ាងណាមិញ នៅនាទីទី 91 Paulinho បានតែតបាល់ជ្រុងរបស់ Pedro Goncalves ដើម្បីផ្ដល់ការនាំមុខសម្រាប់ក្រុមម្ចាស់ផ្ទះ។ កីឡាករ Arthur Gomes បានទាត់ចូលប្រលោះជើងអ្នកចាំទី Spurs ដើម្បីផ្ដល់ការនាំមុខ 2-0 សម្រាប់ Sporting ដែលជាលទ្ធផលចប់ការប្រកួត៕

អ្នកអាចចែករំលែកដោយ៖

អត្ថបទទាក់ទង