ជំនួប EPL ចំនួន4គូរបស់ Liverpool, City, Arsenal, Spurs ផ្សាយបន្តផ្ទាល់នៅ CBS សប្ដាហ៍នេះ

Premier League
October 21st, 2022 (3 years)
1344 Views
Share

ក្នុងរយៈពេលមួយសប្ដាហ៍នេះ ការប្រកួត Premier League មានភាពមមាញឹកខ្លាំង ដោយសារកាលវិភាគ World Cup កាន់តែខិតជិត។ បន្ទាប់ពីការប្រកួតពាក់កណ្ដាលសប្ដាហ៍ ក្លិបទាំងអស់ នឹងវិលត្រឡប់មកកាន់ការប្រកួតជាថ្មី នៅចុងសប្ដាហ៍នេះ។

CBS នឹងធ្វើការផ្សាយបន្តផ្ទាល់ការប្រកួតចំនួន 4 គូ សម្រាប់សប្ដាហ៍ទី 13 ។ នៅថ្ងៃសៅរ៍ ទី 22 ខែតុលា ជំនួបរវាង Nottingham Forest និង Liverpool នឹងមានការផ្សាយបន្តផ្ទាល់នៅលើកញ្ចក់ទូរទស្សន៍ MyTV ចាប់ពីម៉ោង 18:30 នាទីតទៅ។ ក្រុមភ្ញៀវហង្សក្រហម កំពុងតែវិលត្រឡប់ទៅកាន់ទម្រង់ដ៏ល្អរបស់ពួកគេវិញ បន្ទាប់ពីយកឈ្នះ Manchester City និង West Ham ក្នុងរយៈពេលមិនដល់ 1 សប្ដាហ៍ឡើយ។ កូនក្រុមរបស់លោក Jurgen Klopp ត្រូវបានគេរំពឹងថា នឹងអាចបន្តរកបាន 3 ពិន្ទុ នៅពេលដែលពួកគេត្រូវជួបក្រុមបាតតារាង N. Forest ។

នៅថ្ងៃដដែល វេលាម៉ោង 21:00 នាទីតទៅ MyTV នឹងផ្សាយបន្តផ្ទាល់ការប្រកួតរបស់ Manchester City ទល់នឹង Brighton ។ កូនក្រុមរបស់លោក Pep Guardiola មិនមានការប្រកួតនោះទេ កាលពីពាក់កណ្ដាលសប្ដាហ៍ បន្ទាប់ពីការបរាជ័យ 1-0 ក្រោមថ្វីជើងរបស់ Liverpool កាលពីចុងសប្ដាហ៍មុន។ ប៉ុន្តែពួកគេនឹងព្យាយាមដណ្ដើមជ័យជម្នះពី Brighton ដែលមិនទាន់រកឃើញជ័យជម្នះនៅឡើយ បន្ទាប់ពីការចាកចេញរបស់លោក Graham Potter ។

នៅថ្ងៃអាទិត្យ ទី 23 ខែតុលា CBS នឹងធ្វើការផ្សាយបន្តផ្ទាល់ចំនួន 2 គូទៀត រវាង Southampton ជាមួយ Arsenal, និង Tottenham Hotspur ជាមួយ Newcastle United ។

Arsenal នឹងធ្វើដំណើរទៅកាន់កីឡដ្ឋានរបស់ Southampton ដើម្បីស្វែងរក 3 ពិន្ទុបន្ថែម ដើម្បីរក្សាចំណាត់ថ្នាក់កំពូលតារាងរបស់ពួកគេ។ ការប្រកួតនេះ នឹងមានផ្សាយបន្តផ្ទាល់នៅ CTN ចាប់ពីម៉ោង 20:00 នាទីតទៅ។

បន្ទាប់មកទៀត នៅម៉ោង 22:30 នាទី CTN នឹងផ្សាយការប្រកួតរបស់ Spurs ដែលនឹងស្វាគមន៍ Newcastle បន្ទាប់ពីពួកគេបានវិលប្រឡប់ពីបរាជ័យទល់នឹង Man Utd កាលពីពាក់កណ្ដាលសប្ដាហ៍។ នេះមិនមែនជាការប្រកួតដ៏ងាយស្រួលនោះទេក្នុងការជួបជាមួយក្រុមសារិកាព្រៃ ដែលស្គាល់ពាក្យថាចាញ់តែ 1 ប្រកួតប៉ុណ្ណោះក្នុងរដូវកាលនេះ៕

អត្ថបទទាក់ទង

ជំនួប EPL ចំនួន4គូ​របស់ Liverpool, City, Arsenal, Spurs ផ្សាយបន្តផ្ទាល់​នៅ CBS សប្ដាហ៍នេះ

ជំនួប EPL ចំនួន4គូរបស់ Liverpool, City, Arsenal, Spurs ផ្សាយបន្តផ្ទាល់នៅ CBS សប្ដាហ៍នេះ