×

សម្ដេចតេជោ ហ៊ុន សែន អនុញ្ញាតឱ្យទាំងខ្មែរ និងបរទេស ទស្សនា និងផ្សាយពីស៊ីហ្គេម២០២៣ ដោយឥតគិតថ្លៃ

ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានប្រកាសឱ្យទាំងខ្មែរ ទាំងបរទេស មានសិទ្ធិចូលទស្សនាកីឡាស៊ីហ្គេម ដោយមិនបង់ប្រាក់។ សម្តេចបានបញ្ជាក់យ៉ាងដូច្នេះ ក្នុងកិច្ចប្រជុំគណៈរដ្ឋមន្ត្រីនាព្រឹកថ្ងៃទី៣១ ខែមីនា។

ប្រសាសន៍របស់សម្ដេចប្រមុខរដ្ឋាភិបាលកម្ពុជា ដែលអះអាងដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ក៏បានបញ្ជាក់ផងដែរថា សហព័ន្ធកីឡាដែលចូលរួមក៏មិនតម្រូវឱ្យបង់លុយនោះដែរ។ ចំពោះការផ្សាយរបស់ទូរទស្សន៍បរទេសវិញ សម្តេចស្នើឱ្យទម្លាក់ថ្លៃ ឬក៏ឱ្យដោយឥតគិតថ្លៃ (Free) តែម្តង។

លោក ខៀវ កាញារីទ្ធ បាន បន្ថែមថា សម្តេចតេជោ បញ្ជាមិនឱ្យយកលុយពីទូរទស្សន៍បរទេសនានាដែលផ្សាយពីស៊ីហ្គេម៣២ នៅកម្ពុជានោះទេ។

សូមជម្រាបថា សម្តេចតេជោ ហ៊ុន សែន បានលើកឡើងថា៖ «សំខាន់គឺផ្សាយពីប្រទេសកម្ពុជាយើង»។
ការថ្លែងយ៉ាងដូច្នេះ មួយថ្ងៃ បន្ទាប់ពីសម្តេចបានចេញសារជាសំឡេង ដោយហាមឃាត់ការលក់សំបុត្រចូលទស្សនាពិធីបើក ពិធីបិទ និងរាល់ការប្រកួតកីឡាស៊ីហ្គេមលើកទី៣២ ដែលនឹងរៀបចំលើកដំបូងនៅកម្ពុជា៕

អ្នកអាចចែករំលែកដោយ៖

អត្ថបទទាក់ទង