សារព័ត៌មានធំៗលើពិភពលោក ផ្សព្វផ្សាយពីកីឡាការិនី ប៊ួ សំណាង

SEA GAMES 2023
May 12th, 2023 (2 years)
3212 Views
Share

បណ្ដាញសារព័ត៌មានល្បីៗនៅលើពិភពលោក បានងាកមកចាប់អារម្មណ៍លើកីឡាការិនីកម្ពុជា ប៊ួ សំណាង បន្ទាប់ពីនាងបានបង្ហាញពីភាពអំណត់អត់ធ្មត់តស៊ូមិនបោះបង់ ក្នុងការប្រកួតរត់ចម្ងាយ៥គីឡូម៉ែត្រ ទោះបីជាដឹងថាខ្លួននៅក្រោយគេ ស្របពេលដែលមេឃកំពុងភ្លៀងខ្លាំងយ៉ាងណាក៏ដោយ។

មនុស្សទូទៅអាចនឹងបោះបង់ការប្រកួត ប៉ុន្តែសំណាងមិនធ្វើបែបនេះឡើយ។ មូលហេតុនេះហើយ ធ្វើឱ្យកីឡាការិនីរូបនេះបានទាក់ចិត្តរបស់ទស្សនិកជន និងបណ្ដាញសារព័ត៌មាននានា ដែលកំពុងផ្តិតយករូបភាពដ៏អស្ចារ្យពីការប្រកួតក្នុងព្រឹត្តិការណ៍កីឡាស៊ីហ្គេម ដែលកម្ពុជាធ្វើជាម្ចាស់ផ្ទះ។

រូបភាពរបស់សំណាង បានលេចឡើងនៅក្នុងទំព័រសារព័ត៌មានធំៗ ដែលបានយករឿងរ៉ាវរបស់នាងទៅចុះផ្សាយ។ សារព័ត៌មាន BBCបានដាក់ចំណងជើងថា៖ “កីឡាការិនី ប៊ួ សំណាងរបស់កម្ពុជា បានបញ្ចប់ទីរត់ចម្ងាយ៥០០០ម៉ែត្រទោះភ្លៀងខ្លាំង មកក្រោយអ្នកឈ្នះ ៦ នាទី”។

សារព័ត៌មាន The Guardian បានសរសេរថា៖ “កីឡាការិនីរត់ចម្ងាយកម្ពុជា មិនបោះបង់ការប្រកួត ទោះព្យុះភ្លៀងខ្លាំងយ៉ាងណាក៏ដោយ“។

ចំណែកសារព័ត៌មាន The Strait Times ចុះផ្សាយអត្ថបទដែលមានចំណងជើងថា៖ “កីឡាការិនីកម្ពុជាដែលទទឹកជោក ចាញ់ការរត់ចម្ងាយ៥០០០ម៉ែត្រ តែឈ្នះបេះដួងមនុស្សជាច្រើន”។

សារព័ត៌មាន Channel News Asia បានដាក់ចំណងជើងស្រដៀងគ្នា “កីឡាការិនីកម្ពុជាដែលទទឹកជោក បញ្ចប់ទីព្រ័ត្រក្រោយគេនៅស៊ីហ្គេម តែឈ្នះបេះដូងមនុស្សជាច្រើន”៕

ប្រភពរូប៖ Main Stand

អត្ថបទទាក់ទង

សារព័ត៌មានធំៗលើពិភពលោក ផ្សព្វផ្សាយពីកីឡាការិនី ប៊ួ សំណាង

ព្រឹត្តិការណ៍កីឡាអូឡាំពិករដូវក្ដៅ នៅទីក្រុងប៉ារីស