Premier League៖ Gael Clichy អះអាងថា Arteta អាចជាលោក Arsene Wenger ទី២

Premier League
September 27th, 2021 (3 years)
1708 Views
Share

លោក Mikel Arteta អ្នកចាត់ការទូទៅរបស់ Arsenal ត្រូវបានទទួលការកោតសរសើរ បន្ទាប់ពីក្រុមរបស់លោក បានគ្រប់គ្រងលើគូប្រជែង នៅទីក្រុងឡុងដ៍ គឺ Tottenham Hotspur ។

លោក Gael Clichy អតីតខ្សែការពាររបស់ក្រុមកាំភ្លើងធំ បាននិយាយថា Arteta អាចជាលោក Arsene Wenger ទី២។

ក្រុមកាំភ្លើងធំ Arsenal រកបាន ៣គ្រាប់ក្នុងតង់ទី១ ពី Emile Smith-Rowe, Pierre-Emerick Aubameyang និង Bukayo Saka ខណៈដែល Spurs បានវាយបកបាន១គ្រាប់មកវិញ តាមរយៈ Son Heung-min ។

លោក Arteta ដែលមានអាយុ ៣៩ឆ្នាំបាននិយាយថា៖ “ថ្ងៃនេះគឺជាឧទាហរណ៍មួយនៃអ្វីដែលយើងអាចធ្វើបាន។ វាជាថ្ងៃពិសេសមួយ”។

លោកបានបន្ថែមថា៖ “ជ័យជម្នះនេះ គឺសម្រាប់អ្នកគាំទ្ររបស់ពួកយើង។ ពួកគេបាននៅទីនោះនៅពេលដែលយើងត្រូវការការគាំទ្ររបស់ពួកគេ ហើយឥឡូវនេះយើងកំពុងបង្កើតទំនាក់ទំនងជាមួយអ្នកគាំទ្រ។”

ក្រុមកាំភ្លើងធំ Arsenal បានជួបការលំបាកនៅពេលចាប់ផ្តើមរដូវកាលនេះ រួមទាំងការបរាជ័យក្រោមថ្វីជើងរបស់ក្រុម Man City ដោយលទ្ធផល ៥-០ ផងដែរ ខណៈដែលពួកគេបានចាញ់ ៣ប្រកួតដំបូងរបស់ពួកគេ។

ទោះយ៉ាងណា ចាប់តាំងពីការឈប់សម្រាកជាអន្តរជាតិមក ពួកគេបានប្រែក្លាយជោគវាសនារបស់ពួកគេដោយឈ្នះ ៣ ដងជាប់គ្នា។

លោក Clichy ដែលធ្លាប់លេងក្រោមការដឹកនាំរបស់លោក Wenger អស់រយៈពេល៨ឆ្នាំ បានធ្វើការជាមួយ Arteta នៅពេលគាត់ជាគ្រូបង្វឹកនៅ Manchester City ហើយជឿជាក់ថា គ្រូបង្វឹកសញ្ជាតិអេស្ប៉ាញរូបនេះ មានគុណសម្បត្តិគ្រប់គ្រាន់ ដើម្បីកសាងកេរ្តិ៍ឈ្មោះនៅ Arsenal ។

Clichy បានប្រាប់ថា៖ “Arteta មានចំណេះដឹងច្រើន ហើយគាត់បានរៀនសូត្រពីលោក Pep [Guardiola]។”

“ខ្ញុំពិតជាជឿជាក់ថា ក្នុងរយៈពេលវែង គាត់អាចក្លាយជា Arsene Wenger ទី២។ គាត់នៅក្មេងហើយខ្ញុំពិតជាជឿជាក់ថា បើមានពេល គាត់នឹងធ្វើឱ្យគ្រប់គ្នាឈប់គិតអវិជ្ជមានពីគាត់៕”

អត្ថបទទាក់ទង