Manchester City លក់ Ferran Torres ទៅឱ្យ Barcelona បន្ថែមផ្នែកហិរញ្ញវត្ថុលើការតាមចែចង់ Kane និង Haaland

Premier League
December 29th, 2021 (3 years)
889 Views
Share

Manchester City ត្រូវបានគេរាយការណ៍ថា នឹងមិនទាន់រកអ្នកជំនួស Ferran Torres ភ្លាមៗទេ ក្នុងទីផ្សារដោះដូរកីឡាករខែមករា បន្ទាប់ពីខ្សែប្រយុទ្ធរូបនេះ បានផ្ទេរទៅកាន់ក្លិប Barcelona ក្នុងតម្លៃ ៥០លានផោនក្នុងសប្តាហ៍នេះ។

យោងតាមសារព័ត៌មាន ESPN ក្រុមដែលកំពុងឈរនៅកំពូលតារាងនៃក្របខណ្ឌ Premier League បានសម្រេចចិត្តក្នុងការមិនស្វែងរកអ្នកជំនួសកីឡាករអេស្ប៉ាញវ័យ ២១ ឆ្នាំក្នុងឆ្នាំថ្មីទេ។

ទោះជាយ៉ាងណាក៏ដោយ Man City គ្រោងនឹងប្រើប្រាស់ប្រាក់ដែលបានមកពីការលក់នេះ ដើម្បីបង្កើនកិច្ចខិតខំប្រឹងប្រែងក្នុងការចុះហត្ថលេខាលើខ្សែប្រយុទ្ធម្នាក់នៅពេលចប់រដូវកាល នារដូវក្តៅខាងមុខ។

Harry Kane របស់ក្រុម Tottenham Hotspur និង Erling Haaland របស់ក្រុម Dortmund គឺជាកីឡាករពីររូបដែល Man City កំពុងតាមដាន ដោយកីឡាករទាំងពីរ ទំនងជានឹងផ្លាស់ពីក្លិបរបស់ពួកគេ នៅចុងរដូវកាលនេះ។

ជាការពិតណាស់ ខ្សែប្រយុទ្ធទាំងពីរ ត្រូវបានផ្សារភ្ជាប់ជាមួយនឹងការផ្លាស់ប្តូរទៅកាន់ក្លិបយក្ស Manchester City ក្នុងរយៈពេល ៦ ខែចុងក្រោយនេះ ហើយការលក់ Torres អាចផ្តល់ឱ្យក្រុមរបស់លោក Pep Guardiola នូវផ្នែកហិរញ្ញវត្ថុបន្ថែម ក្នុងការចុះហត្ថលេខាលើ Kane ឬ Haaland ។

ក្រុម Manchester City មាន ៦ពិន្ទុដាច់នៅលើកំពូលតារាង Premier League ដូច្នេះ Man City អាចរក្សាគ្រងជើងឯកបានដោយមិនទាន់ទិញខ្សែប្រយុទ្ធថ្មី។

កុំភ្លេចរង់ចាំទស្សនា កម្មវិធី CBS Fantasy League ដែលចាក់ផ្សាយរៀងរាល់ថ្ងៃសុក្រ វេលាម៉ោង ២១:០០ – ២២:០០។

ទស្សនាការប្រកួតដ៏ជក់ចិត្តបណ្តើរ ឆាតលេងកម្សាន្តបណ្តើរ ប៉ុន្តែកុំភ្លេចដាក់រូបភាពរបស់លោកអ្នកនៅតេឡេក្រាមផង ពេលនោះលោកអ្នកនឹងអាចឃើញសាររបស់លោកអ្នកនៅលើកញ្ចក់ទូរទស្សន៍៕

អត្ថបទទាក់ទង