ការកាត់១០ពិន្ទុរបស់ Everton ត្រូវប្តូរមកត្រឹមកាត់៦ពិន្ទុវិញ ក្រោយការប្តឹងឧទ្ធរណ៍

Premier League
February 27th, 2024 (1 year)
567 Views
Share

ការពិន័យរបស់ Everton ចំពោះការបំពានច្បាប់ហិរញ្ញវត្ថុនៅក្របខណ្ឌ Premier League ត្រូវបានកាត់បន្ថយការពិន័យ ដោយប្តូរពីការកាត់១០ពិន្ទុ មកត្រឹមកាត់ការ ៦ពិន្ទុ ក្រោយពីក្លិបបានធ្វើការប្តឹងឧទ្ធរណ៍រួចមក។

ក្លិបរហស្សនាមស្ករគ្រាប់ ត្រូវបាន Premier League ពិន័យដោយការប្រកាសកាត់១០ពិន្ទុ កាលពីខែវិច្ឆិកា ចំពោះការបំពានច្បាប់ប្រាក់ចំណេញ និង និរន្តរភាព ក្នុងរយៈពេល៣ឆ្នាំ ដល់រដូវកាល ២០២១-២២។

នេះជាការដាក់ទណ្ឌកម្មដែលធំបំផុតក្នុងប្រវត្តិសាស្ត្រ Premier League ដោយបានទម្លាក់ Everton ពីលេខ១៤ មកលេខ១៩ ក្នុងតារាង នៅពេលនោះ។

យ៉ាងណាមិញ ក្លិបបានប្តឹងឧទ្ធរណ៍ប្រឆាំងនឹងការទណ្ឌកម្មដែលពួកគេអះអាងថា វាមិនសមាមាត្រ និងអយុត្តិធម៌។

សេចក្តីថ្លែងការណ៍របស់ក្លិបបាននិយាយថា៖ “Everton អាចបញ្ជាក់ក្រុមប្រឹក្សាបណ្តឹងឧទ្ធរណ៍បានសន្និដ្ឋានថា ការកាត់ពិន្ទុដែលដាក់ដោយគណៈកម្មការឯករាជ្យនៃក្របខណ្ឌ Premier League នៅក្នុងខែវិច្ឆិកាត្រូវបានកាត់បន្ថយពី ១០ ពិន្ទុមកត្រឹម ៦ ពិន្ទុដោយមានប្រសិទ្ធិភាព។”

ការកាត់បន្ថយនេះមានន័យថា Everton ឡើងទៅឈរនៅលេខរៀងទី ១៥ ក្នុងតារាងដែលមាន ២៥ ពិន្ទុ។

សម្រាប់ក្របខណ្ឌ Premier League វិញ បាននិយាយនៅក្នុងសេចក្តីថ្លែងការណ៍មួយថា៖ “ក្រុមប្រឹក្សាឧទ្ធរណ៍ឯករាជ្យបានសន្និដ្ឋានចំពោះ ការដាក់ទណ្ឌកម្មលើការបំពានរបស់ Everton នៃច្បាប់ស្តីពីប្រាក់ចំណេញ និងនិរន្តរភាព PSRs សម្រាប់រយៈពេលបញ្ចប់រដូវកាល ២០២១-២២ នឹងក្លាយជាការកាត់ចេញចំនួន ៦ តែប៉ុណ្ណោះ។”

ដោយឡែក ទោះជាការកាត់បន្ថយទណ្ឌកម្មនេះ បានជួយរុញច្រានក្លិប Everton បានមួយចំណែកក៏ដោយ ប៉ុន្តែក្លិបក៏នឹងអាចប្រឈមមុខទៅនឹងការកាត់ពិន្ទុផ្សេងទៀតដែលអាចធ្វើបានដដែល៕

អត្ថបទទាក់ទង