Heung-Min Son៖ “ខ្ញុំទទួលខុសត្រូវលើការចាកចេញរបស់លោកគ្រូ Conte”

Premier League
March 29th, 2023 (2 years)
1037 Views
Share

Heung-Min Son បាននិយាយថា រូបគេមានចំណែកដែលធ្វើឱ្យលោក Antonio Conte ចាកចេញពីក្លិប Tottenham Hotspur បន្ទាប់ពីរូបគេបង្ហាញទម្រង់លេងមិនបានល្អដូចកាលពីរដូវកាលមុន។

កីឡាករវ័យ ៣០ឆ្នាំរូបនេះ ជាអ្នកស៊ុតបញ្ចូលទីច្រើនជាងគេនៅក្របខណ្ឌ Premier League ដោយរកបាន ២៣ គ្រាប់កាលពីរដូវកាលមុន ដើម្បីជួយ Spurs បញ្ចប់ក្នុងចំណាត់ថ្នាក់លេខ ៤ ក្រោមការដឹកនាំរបស់លោក Conte ប៉ុន្តែខ្សែប្រយុទ្ធកូរ៉េខាងត្បូងរូបនេះ រកបានតែ ៦ គ្រាប់ប៉ុណ្ណោះចាប់តាំងពីដើមរដូវកាល ២០២២-២៣ នៅលីគកំពូលអង់គ្លេស។

Spurs បានចែកផ្លូវពីលោក Conte បន្ទាប់ពីគាត់បានចាត់ទុកកូនក្រុមរបស់គាត់ជា មនុស្ស “អាត្មានិយម” បន្ទាប់ពីប្រកួតស្មើជាមួយ Southampton ។

Son បាននិយាយក្រោយការចាញ់ក្រុមអ៊ុយរុយហ្គាយក្នុងការប្រកួតមិត្តភាពក្នុងទីក្រុងសេអ៊ូល ថា៖ “ក្នុងនាមជាកីឡាករ ខ្ញុំពិតជាសោកស្តាយ។ គាត់គឺជាគ្រូបង្វឹកលំដាប់ពិភពលោក ហើយពួកយើងបានដើរលើវិថីដ៏អស្ចារ្យជាមួយគ្នា”។

“ខ្ញុំគួរតែលេងឱ្យបានល្អជាងនេះ។ ខ្ញុំមានអារម្មណ៍ថា មានទំនួលខុសត្រូវចំពោះការចាកចេញរបស់គាត់ ពីព្រោះខ្ញុំមិនបានជួយក្លិបបានច្រើននោះទេ។ ខ្ញុំសូមអរគុណចំពោះអ្វីដែលគាត់បានធ្វើ។ គាត់ជាគ្រូបង្វឹកដ៏អស្ចារ្យម្នាក់ ហើយមានបទពិសោធច្រើន។ ខ្ញុំនឹងបន្តគាំទ្រគាត់។”

Spurs បានធ្លាក់ចេញពីការប្រកួតពានរង្វាន់ Cup និង Champions League។ ពួកគេឈរនៅលេខ ៤ ក្នុង Premier League ដោយមាន ៤៩ ពិន្ទុ ក្នុង ២៨ ប្រកួត៕

អត្ថបទទាក់ទង