Man UTD ប្រកាសពីការទិញបានខ្សែបម្រើ Mason Mount

Premier League
July 6th, 2023 (1 year)
396 Views
Share

Manchester United បានចុះហត្ថលេខាលើខ្សែបម្រើ Mason Mount ពី Chelsea ក្នុងកិច្ចសន្យារយៈពេល៥ឆ្នាំជាមួយនឹងជម្រើសសម្រាប់រយៈពេល ១២ ខែបន្ថែមទៀត។ នេះបើតាមការប្រកាសរបស់ក្លិប Premier League កាលពីថ្ងៃពុធ។

កីឡាករជម្រើសជាតិអង់គ្លេសវ័យ ២៤ ឆ្នាំ ត្រូវបានចុះហត្ថលេខាដោយ Man UTD ក្នុងតម្លៃ ៥៥ លានផោន បូករួមទាំងការបន្ថែមថ្លៃចំណាយផ្សេងៗចំនួន៥ លានផងដែរ ហើយរូបគេទទួលបានអាវលេខ៧។

នៅក្នុងការចាកចេញពី Chelsea មកចូលរួមជាមួយ Man UTD នោះ Mount បាននិយាយនៅក្នុងសេចក្តីថ្លែងការណ៍មួយថា៖ “Manchester United នឹងផ្តល់នូវការប្រកួតប្រជែងថ្មីដ៏គួរឱ្យរំភើបសម្រាប់ដំណាក់កាលបន្ទាប់នៃអាជីពរបស់ខ្ញុំ។ ដោយបានប្រកួតជាមួយពួកគេ ខ្ញុំដឹងថាក្រុមខ្លាំងប៉ុណ្ណា ហើយខ្ញុំមិនអាចរង់ចាំក្នុងការក្លាយជាផ្នែកនៃក្រុមនេះដើម្បីឈ្នះពានរង្វាន់ធំៗនោះទេ។”

រូបគេបានបន្តថា៖ “គ្រប់គ្នាអាចមើលឃើញថាក្លិបបានបោះជំហានទៅមុខយ៉ាងធំ ក្រោមការដឹកនាំរបស់ Erik ten Hag។ ដោយបានជួបជាមួយអ្នកគ្រប់គ្រង និងពិភាក្សាអំពីផែនការរបស់គាត់ ខ្ញុំរំភើបណាស់ ហើយខ្ញុំត្រៀមខ្លួនរួចជាស្រេចសម្រាប់ការខិតខំប្រឹងប្រែងដែលរំពឹងទុកនៅទីនេះ”។

Mason Mount កីឡាករដែលដុះដាលចេញពីថ្នាលយុវជន Chelsea បានបង្ហាញខ្លួនជាលើកដំបូងក្នុងឆ្នាំ ២០១៧ ហើយចាប់តាំងពីពេលនោះមក រូបគេបានស៊ុតបញ្ចូលទីបាន ៣៣ គ្រាប់ និងចែកបាល់សម្រេចទី៣៧ ដង ពីការបង្ហាញខ្លួន ១៩៥លើក គ្រប់ការប្រកួតរបស់ក្រុមតោខៀវ។

កីឡាករជម្រើសជាតិអង់គ្លេស វ័យ២៤ឆ្នាំ ដែលធ្លាប់លេងខ្ចីជើងនៅ Vitesse Arnhem និង Derby County បានជួយ Chelsea ឈ្នះជើងឯក Champions League, UEFA Super Cup និង FIFA Club World Cup ផងដែរ។

កាលពីរដូវកាលមុន Mount បានលេងក្នុងលីគចំនួន ២៤ ប្រកួត ដោយស៊ុតបញ្ចូលទីបាន៣ គ្រាប់ និង ចែកបាល់សម្រេចទី២លើក ប៉ុន្តែរូបគេក៏ត្រូវបានញ៉ាំញីដោយបញ្ហារបួសអាងត្រគាក។

Mason Mount នឹងក្លាយជាកីឡាករដំបូងរបស់ លោក Erik ten Hag នៅរដូវក្តៅនេះ ខណៈការចង់ពង្រឹងក្រុមបិសាចក្រហមរបស់លោកកំពុងដំណើរការ បន្ទាប់ពីពួកគេទទួលបានសិទ្ធិសម្រាប់ការប្រកួត Champions League រដូវកាលក្រោយ៕

#អត្ថបទទាក់ទង
#Chelsea
#Manchester United
#Premier League

អត្ថបទទាក់ទង