គ្រូ Chelsea បង្ហាញការពេញចិត្តកីឡាករខ្លួនក្រោយឈ្នះ Los Angeles FC នៅ FIFA Club World Cup

Premier League
June 17th, 2025 (8 months)
434 Views
Share

គ្រូបង្វឹក Chelsea លោក Enzo Maresca បានបង្ហាញពីការពេញចិត្តយ៉ាងខ្លាំងទៅលើកីឡាកររបស់លោក បន្ទាប់ពីពួកគេបានយកឈ្នះការប្រកួតលើក្រុមម្ចាស់ផ្ទះ Los Angeles FC នៅពានរង្វាន់ FIFA Club World Cup 2025 ជុំទី១ ពូល D។

ការប្រកួតដែលធ្វើឡើងនាកីឡដ្ឋាន Mercedes-Benz Stadium ស្ថិតក្នុងទីក្រុង Atlanta សហរដ្ឋអាមេរិកនោះ គឺខ្សែបម្រើ Pedro Neto ជាអ្នករកគ្រាប់បាល់បើកឆាកសម្រាប់ Chelsea នៅក្នុងនាទី៣៤ ដោយការប្រកួតវគ្គទី១ មានគ្រាប់បាល់បញ្ចូលទីតែ១លើកនេះ។

ឈានមកដល់វគ្គទី២ នាទី៧៩ ទើបមានគ្រាប់បាល់បញ្ចូលទី១គ្រាប់ទៀត ដែលជាការធ្វើបានពី Enzo Fernandez។ សម្រាប់ Los Angeles FC វិញមិនមានឱកាសស៊ុតបញ្ចូលទីគូប្រជែងនោះទេ។ រីឯ Chelsea ក៏ប្រឹងបន្តវាយសម្រុកស្វែងរកគ្រាប់បាល់បន្ថែម ប៉ុន្តែមិនបានសម្រេច ទើបលទ្ធផល Chelsea ២ Los Angeles FC ០ រក្សាដល់ចប់ការប្រកួត។

ជាមួយនឹងការបង្ហាញចេញបានល្អរបស់កូនក្រុម បានធ្វើអោយលោក Enzo Maresca ដែលជាគ្រូបង្វឹក Chelsea មានភាពរីករាយ ហើយលោក ក៏បានសរសើរពីគុណភាពផ្លូវចិត្តរបស់កីឡាករដោយថា មានវិជ្ជាជីវៈ ហើយបានសម្របខ្លួនទៅនឹងស្ថានភាព ឬបរិយាកាសណាមួយ។

លោក Maresca បានអោយដឹងដូច្នេះ “អ្វីដែលសំខាន់គឺអាកប្បកិរិយារបស់កីឡាករ ហើយថ្ងៃនេះពួកគេបានបង្ហាញពីភាពជាអាជីពនិងក្ដីប្រាថ្នាដែលពួកគេមាន ពីព្រោះវាសំខាន់ក្នុងការឈ្នះថ្ងៃនេះ ។ យើងបានបញ្ចប់រដូវកាល Premier League ហើយ Conference League បានយ៉ាងល្អ ហើយឥឡូវយើងបានបន្តរឿងនោះ។ យើងចង់នៅជាមួយអាកប្បកិរិយានេះ។”

Chelsea បច្ចុប្បន្ននៅឈរកំពូលតារាងពូល D មាន ៣ពិន្ទុ ខណៈ ក្រុមប្រេស៊ីល Flamengo និង ក្រុមទុយនេស៊ី Espérance de Tunis មិនទាន់បានឆ្លងកាត់ការប្រកួតទេ ហើយ ក្រុម Los Angeles FC កំពុងស្ថិតនៅបាតតារាង៕

អត្ថបទទាក់ទង